"Avropada təhlükəsizlik böhranı dərinləşir" - "The Times"

Bizi sosial şəbəkələrdən izləyin:

"NATO sərtləşir, Rusiya dron hücumlarını artırır, İsveçdə nüvə silahı ilə bağlı debatlar başlayır..."

Rusiyanın hibrid müharibə addımları, NATO sərhədlərinə yönəlmiş dron və təyyarə təxribatları, həmçinin Şimali Avropada nüvə silahı ilə bağlı yaranan müzakirələr qitəni yeni təhlükəsizlik mərhələsinə aparır.

Moderator.az xəbər verir ki, bu barədə "The Times" nəşri yazıb.

NATO-da qaydaların sərtləşdirilməsi

Nəşr yazır ki, NATO artıq sadəcə hava məkanının patrul edilməsi ilə kifayətlənmək istəmir. Son həftələrdə Polşa, Rumıniya və Estoniya üzərində Rusiya təyyarələri və dronlarının dəfələrlə hava məkanını pozması, eləcə də Skandinaviya ölkələrinin hərbi bazaları yaxınlığında şübhəli uçuşların artması NATO-nu hərəkətə keçirib.

Latviya prezidenti Edqars Rinkeviçs açıq şəkildə bildirib ki, "hava patrulu" missiyası artıq "hava müdafiəsi" missiyasına çevrilməlidir. Bu isə əlavə zenit sistemlərinin yerləşdirilməsi və Rusiya təyyarələrinə qarşı daha sərt qaydaların tətbiqi deməkdir. ABŞ prezidenti Donald Tramp da açıq şəkildə müttəfiqləri hava məkanını pozan Rusiya təyyarələrini vurmağa çağırıb.

"Rusiya tankerlərdən istifadə edir"

Ukrayna prezidenti Vladimir Zelenski isə Rusiyanın "kölgə tanker donanması"ndan Avropaya qarşı dron hücumlarında istifadə etdiyi barədə kəşfiyyat məlumatlarını açıqlayıb. Onun sözlərinə görə, tankerlər yalnız neft daşımaq üçün deyil, həm də pilotsuz aparatların buraxılışı və idarəsi üçün istifadə olunur. Zelenski Avropanı Rusiyanın enerji və ticarət infrastrukturuna qarşı sanksiyaları sərtləşdirməyə çağırıb və vurğulayıb ki, "Baltik dənizi və digər dənizlər Rusiya tankerləri üçün bağlanmalıdır".

Şimali Avropada nüvə mübahisələri

Bu gərgin fonda İsveçdə də müzakirələr başlayıb: ölkənin öz nüvə silahını yaratmaq ehtimalı gündəmə gəlib. "The Times" yazır ki, mövzu hələlik siyasi debat səviyyəsində olsa da, İsveç Demokratları partiyasının lideri Cimmi Okesson və bir sıra siyasətçilər "Avropanın təhlükəsizliyi üçün nüvə çəkindirməsində İsveçin də rolu olmalıdır" fikrini müdafiə edir. Mütəxəssislər isə xəbərdarlıq edir ki, belə bir proqram ölkəyə çox böyük sənaye resursları, yeni infrastruktur və on illərlə zaman tələb edəcək. Hələlik real plan yoxdur, lakin mövzu artıq gündəmin mərkəzinə düşüb.

Avropada yeni təhlükəsizlik mərhələsi

Rusiyanın hibrid hücumları, NATO daxilində güc tətbiqi qaydalarının sərtləşdirilməsi və nüvə silahı ətrafında yaranan müzakirələr Avropanın təhlükəsizlik gündəmini tamamilə dəyişib. Qitə yeni bir mərhələyə qədəm qoyur - burada kompromislər yox, daha çox sərt qərarlar və çəkindirici addımlar ön plana çıxır.