"Rusiya Ukraynanın Kiyev və Zaporojye şəhərlərinə ağır zərbələr endirib" - Ukrayna KİV-ləri

Bizi sosial şəbəkələrdən izləyin:

"Bu, sivil əhalinin qorxudulmasına və kritik infrastrukturun sıradan çıxarılmasına yönəlmiş terrordur..."

Rusiyanın 28 sentyabr gecəsi başladığı genişmiqyaslı hava hücumu Ukraynanın paytaxtı Kiyev və Zaporojye şəhərlərində böyük dağıntılara, mülki itkilərə və çoxsaylı yaralılara səbəb olub.

Moderator.az xəbər verir ki, bu barədə "obozrevatel.com" nəşri məlumat yayıb.

Kiyevdə dağıntılar və qurbanlar

Ukrayna hakimiyyəti bildirir ki, bu hücum son illərin ən güclülərindən biri kimi qiymətləndirilir. Kiyevə yüzlərlə raket və pilotsuz uçuş aparatı ilə hücum nəticəsində şəhərin ən azı altı rayonunda dağıntılar qeydə alınıb.

Solomensk rayonunda beşmərtəbəli yaşayış binası qismən dağılıb, yanğın baş verib. Dağıntılar altından 12 yaşlı qızın meyiti çıxarılıb. Ümumilikdə paytaxtda azı 4 nəfər həlak olub, onlarla sakin yaralanıb.

Darnitsa, Dnepr və Qoloseyevsk rayonlarında qəlpələrin düşməsi nəticəsində yaşayış evləri, uşaq bağçası və avtomobillər zədələnib, bir sıra yerlərdə yanğınlar baş verib. Şəhər meri Vitali Kliçko bildirib ki, yaralılardan bəziləri xəstəxanalara yerləşdirilib, digərlərinə isə yerindəcə tibbi yardım göstərilib.

Zaporojiye hədəfdə

Rus qoşunları eyni vaxtda Zaporojye şəhərinə də zərbələr endirib. Şəhərin müxtəlif yerlərinə azı dörd raket düşüb, onlardan biri yaşayış binasına tuş gəlib. Səhər saatlarında çoxmərtəbəli binalardan birində güclü yanğın başlayıb.

Rəsmi məlumatlara görə, 21 nəfər xəsarət alıb, onların arasında üç uşaq da var. İki nəfərin vəziyyəti ağırdır. Zərbələr nəticəsində doqquz fərdi ev, 14 çoxmərtəbəli bina və sənaye müəssisələrinin bir hissəsi dağılıb. Bir avtomobil yanacaqdoldurma məntəqəsi də zədələnib.

Reaksiyalar və təhlükəsizlik tədbirləri

Ukrayna xarici işlər naziri Andrey Sibiqa hücumu "sivil əhalinin qorxudulmasına və kritik infrastrukturun sıradan çıxarılmasına yönəlmiş terror" adlandırıb. O bildirib ki, Rusiyanın taktikası artıq açıq şəkildə mülki əhalini hədəfə alır.

Hücum fonunda Polşa da öz hava məkanını qismən bağlayaraq döyüş təyyarələrini havaya qaldırıb. Avropa İttifaqı və digər müttəfiqlər Rusiyanın raket-dron strategiyasını pisləyib və Ukraynaya dəstəyin davam edəcəyini vurğulayıb.

Rusiyanın ardıcıl hücumları həm paytaxt Kiyevdə, həm də Zaporojye kimi iri şəhərlərdə mülki infrastrukturu dağıdıb, uşaqlar da daxil olmaqla onlarla insanın həyatını təhlükə altına atıb. Ukrayna rəsmiləri hücumların davam edə biləcəyini bildirərək əhaliyə sığınacaqlardan istifadə etməyi tövsiyə edir.