Yeni tədris ili ərəfəsində valideynlər övladlarını psixoloji olaraq necə hazırlamalıdırlar?

Bizi sosial şəbəkələrdən izləyin:

"Sən bunu bacarmalısan" təzyiqi əvəzinə "Sənin bacarığına inanıram" uşağın həm psixoloji sağlamlığını qoruyur, həm də motivasiyasını gücləndirir".

Moderator.az xəbər verir ki, bu fikirləri Səhiyyə Nazirliyi Respublika Psixiatriya Xəstəxanasının psixoloqu İlahə Dadaşova nazirliyin Media və kommunikasiya şöbəsinə müsahibəsində deyib.

O, dərs zamanı diqqəti tez yayınan uşaqlara necə kömək etmək lazım olduğuna aydınlıq gətirib:

"Dərs zamanı diqqəti tez yayınan uşaqlarla işləməyin ilk addımı onların diqqət imkanlarının nəzərə alınmasıdır. Belə uşaqlar uzun müddət eyni fəaliyyətə fokuslana bilmirlər.

Burada sistemli yanaşma lazımdır. Uşağın diqqət resursunu nəzərə almaq vacibdir. Buna görə də tapşırıqları daha kiçik hissələrə bölmək, tez-tez qısa fasilələr vermək faydalıdır. Məsələn, onları 5-10 dəqiqəlik mərhələlərlə təqdim etmək uşaq üçün daha əlçatan olur.

Bundan əlavə, interaktiv metodlardan istifadə uşaqların dərslərə marağını artırır. Şəkillər, qısa videolar, rəngli kartlar və ya qrup tapşırıqları kimi vasitələrdən istifadə etdikdə uşaq mövzuya daha çox fokuslana bilir. Bu yanaşma həm dərsin monotonluğunu azaldır, həm də uşağın marağını canlı saxlayır.

Digər mühüm istiqamət emosional mühit və motivasiyadır. Uşağı daim tənqid etmək əvəzinə kiçik nailiyyətlərini vurğulamaq onun özünəinamını artırır.

Eyni zamanda, gündəlik rejimin qurulması tövsiyə olunur. Bu, onun beynində "indi dərs vaxtıdır, indi isə oyun" kimi aydın siqnallar yaradır və diqqəti toplamağı asanlaşdırır.

Qeyd etmək lazımdır ki, diqqət məşqləri və oyunlardan istifadə etmək çox faydalıdır. Məsələn, "Fərqləri tap", "tapmacalar və ya qısa yaddaş oyunları uşağın diqqətini inkişaf etdirir".

O, valideynlərin yüksək gözləntilərinin uşağa zərər verməsindən bəhs edib:

"Bəli, verə bilər, çünki yüksək standartlara uyğunlaşmağa çalışan uşaq "mən kifayət qədər yaxşı deyiləm" düşüncəsi ilə yaşayır. Bu, xroniki stres, qorxu və motivasiyanın itməsinə səbəb olur. "Sən bunu bacarmalısan" təzyiqi əvəzinə "Sənin bacarığına inanıram" uşağın həm psixoloji sağlamlığını qoruyur, həm də motivasiyasını gücləndirir. Bu yanaşma uşağın psixikasını qoruyur və onu, həqiqətən də, motivasiya edir".