"Putin qadınlara və uşaqlara hücum edən qorxaqdır: Avropadan sərt reaksiya" - "Deutsche Welle"

Bizi sosial şəbəkələrdən izləyin:

"Kreml diplomatiyanı ələ salır və qan tökməkdə davam edir..."

7 sentyabr gecəsi Rusiya Ukraynaya qarşı indiyədək görünməmiş hücum həyata keçirib: 800-dən çox raket və kamikadze dronu buraxılıb.

Moderator.az xəbər verir ki, bu barədə "dw.com" nəşri yazıb.

Nəşr yazır ki, ilk dəfə olaraq Kiyevdə hökumət binası - Nazirlər Kabineti hədəfə alınıb. Paytaxtın mərkəzində alovlanan binanın görüntüləri bütün dünyaya yayılıb. Bununla yanaşı, çoxmərtəbəli yaşayış binaları da dağılıb. Ən dəhşətlisi isə odur ki, Svyatoşin rayonunda ana və üç aylıq körpəsi həyatını itirib. Onlarla yaralı var, xilasetmə işləri davam edir.

Avropa liderlərinin qəzəbli reaksiyası

Avropa İttifaqı rəhbərləri bu hücumu "rus terrorunun yeni mərhələsi" adlandırıb. Avropa Komissiyasının prezidenti Ursula fon der Lyayen bildirib ki, Kreml "diplomatiyanı ələ salır və qan tökməyə davam edir". O, Ukraynaya hərbi dəstəyin artırılacağını və Rusiyaya qarşı sanksiyaların daha da sərtləşdiriləcəyini vurğulayıb.

Avropa Şurasının prezidenti Antoniu Koşta isə qeyd edib: "Sülhdən danışıb eyni anda hökumət binalarını bombalamaq Putinin anlamında "sülh" deməkdir". O, əlavə sanksiyaların və koordinasiyalı hərbi yardımın vacibliyini bildirib.

Çexiyanın xarici işlər naziri Yan Lipavski açıq şəkildə deyib: "Putin qadınlara və uşaqlara hücum edən qorxaqdır. Yardımı dayandırmaq təcavüzkarın tərəfini tutmaq deməkdir". Estoniya və Latviya da sərt bəyanatlarla çıxış edərək yeni silah tədarükünün qaçılmaz olduğunu qeyd edib.

Fransa, Britaniya və Baltik ölkələrindən dəstək

Fransa prezidenti Emmanuel Makron hücumu "sülhü tapdalayan terror" kimi qiymətləndirərək Ukraynaya dəstəyin davam edəcəyini vurğulayıb. Böyük Britaniyanın baş naziri Kir Starmer isə deyib: "Bu hücumlar Putinin cəzasızlıq hissindən doğur. Biz Ukraynanı əvvəlkindən daha qətiyyətlə müdafiə etməliyik".

Latviya prezidenti Edqars Rinkeviçs və baş nazir Evika Silina da bildiriblər ki, Kreml sülh istəmir, onun hədəfi daha geniş müharibədir. "İlk dəfə hökumət binası vurulub. Bunu dayandırmaq lazımdır", - Silina yazıb. Moldova prezidenti Maya Sandu isə Kiyevdə hökumət binasının vurulmasını "yalan və terror üzərində qurulan siyasət" adlandırıb və ölkəsinin Ukraynanın yanında olduğunu bildirib.

ABŞ mətbuatının mövqeyi

Rəsmi Vaşinqton hələlik susur. Lakin "The New York Times" yazıb ki, bu hücum "Tramp administrasiyasının vasitəçilik cəhdlərini alt-üst edən amansız hücum əməliyyatının son epizodudur". ABŞ mediası Kiyevdəki hökumət binasının vurulmasını Ukrayna hava müdafiəsinin ən güclü qatının yarılması kimi qiymətləndirib.

Hava müdafiəsi hələ də kifayət etmir

Ukrayna Hərbi Hava Qüvvələrinin nümayəndəsi Yuriy İqnat etiraf edib ki, bütün ölkəni tam hava hücumundan müdafiə ilə əhatə etmək qeyri-mümkündür. Raketlər və dronlar daim modernləşdirilir, onların trayektoriyası HHM-in zəif nöqtələrinə uyğun hesablanır. Buna baxmayaraq, ukraynalı hərbçilər həmin gecə 747 dronu və dörd raketi vurmağı bacarıblar.

Kiyevdə qadın və körpəsinin ölümü, hökumət binasının alovlanması Avropanın qapısında müharibənin nə qədər qəddar və yaxın olduğunu bir daha göstərib. Amma əsas sual açıq qalır: sərt bəyanatlar, başsağlığı mesajları vəd olunan real hərbi və iqtisadi addımlara çevriləcəkmi?