"HƏMAS bütün girovları azad etməyə hazırdır, amma şərti var" - "The İnsider"

Bizi sosial şəbəkələrdən izləyin:

"Bütün girovlar dərhal azad edilərsə, Qəzzada vəziyyət çox sürətlə dəyişəcək..."

HƏMAS son günlər İsrail və beynəlxalq ictimaiyyətə ünvanladığı bəyanatlarla münaqişənin yeni mərhələsini açıb.

Moderator.az xəbər verir ki, bu barədə "The İnsider" nəşri yazıb.

Təşkilat elan edib ki, bütün israilli girovları azad etməyə hazırdır, lakin bunun müqabilində yalnız konkret sayda fələstinli məhbusların buraxılmasını deyil, həm də tam hərbi əməliyyatların dayandırılmasını, İsrail qoşunlarının Qazadan çıxarılmasını və sərhəd-keçid məntəqələrinin açılmasını tələb edir.

Bəyanatın ən diqqətçəkən hissəsi isə HƏMAS-ın "texnokrat hökuməti" qurmaq təklifidir. İslamçı qruplaşma Qəzzanın idarəçiliyini guya müstəqil milli administrasiyaya ötürməyə hazır olduğunu bildirir. Lakin İsraildə bu açıqlama şübhə ilə qarşılanır.

Təl-Əviv açıq şəkildə bildirir ki, yalnız HƏMAS-ın tam silahsızlandırılması, hərbi və inzibati strukturunun ləğvi və təhlükəsizliyin İsrail nəzarətində qalması müharibəyə son qoya bilər. Rəsmi dairələr hesab edir ki, hər hansı "yarımçıq həll" HƏMAS-ın gələcəkdə yenidən silahlanmasına və 7 oktyabr kimi qırğınların təkrarlanmasına yol açacaq.

ABŞ prezidenti Donald Tramp isə məsələni daha da kəskinləşdirib. O, sosial şəbəkəsində HƏMAS-a ünvanladığı mesajda "bütün girovların dərhal azad edilməsini" tələb edib. Tramp qeyd edib ki, qismən azadlıq onu qane etməyəcək: "2, 5 və ya 7 yox, hamısı azad olunmalıdır". ABŞ lideri həmçinin xəbərdarlıq edib ki, belə addım atılacağı təqdirdə Qəzzada vəziyyət "çox sürətlə dəyişəcək".

Tramp başqa bir çıxışında İsrailin ABŞ Konqresində əvvəlki kimi güclü dəstəyə sahib olmamasına təəccübünü ifadə edib və xəbərdarlıq edib ki, uzunmüddətli müharibə Yaxın Şərqdə Təl-Əvivin mövqelərinə, həm də beynəlxalq imicinə zərbə vurur. Onun sözlərinə görə, "insanlar artıq 7 oktyabr faciəsini unudub" və ictimai rəyin dəyişməsi İsrailin əleyhinə işləyir.

Beləliklə, HƏMAS "siyasi manevr" edərək özünü sanki hakimiyyətdən imtina etməyə hazır qüvvə kimi təqdim etməyə çalışır. İsrail isə yalnız tam zəfərlə barışmaq niyyətindədir. Trampın sərt bəyanatları isə Vaşinqtonun Qəzzadakı proseslərə birbaşa təzyiq göstərmək niyyətini nümayiş etdirir. Münaqişənin hansı istiqamətə yönələcəyi, qarşıdakı həftələrdə həm döyüş meydanında, həm də diplomatik masada veriləcək qərarlardan asılı olacaq.