Bayramlardan sonra bərpa olunmağın 5 ÜSULU - FOTO

Bizi sosial şəbəkələrdən izləyin:

"Normal iş ritminə dönmək, enerjinizi artırmaq və ili arzularınıza uyğun başlamaq üçün nələr tövsiyə edilir?.."

Əgər Yeni ili qeyd edəndən sonra hələ də özünüzü yorğun və əzgin hiss edirsinizsə, narahat olmayın, siz tək deyilsiniz. Yaxınlarınız üçün hədiyyə axtarışı, ümumi təmizlik, yuxu rejiminin pozulması, alkoqol və bol-bol dadlı yeməklər ciddi fəsadlara səbəb ola bilər. Bəs bu çətin dövrü necə aradan qaldırıb yeni həftənin başlanğıcı ilə iş rejiminə qayıda bilərsiniz?

Moderator.az xarici mediaya istinadla xəbər verir ki, Yeni ili ürəkdolusu qeyd etməyiniz təqdirəlayiqdir, lakin belə rahat bir rejimdə uzun müddət yaşamaq həm fiziki, həm də psixoloji sağlamlığınıza zərərlidir. Nəticədə, hətta depressiya əlamətləri də yarana bilər. Odur ki, iş ritminə qayıtmaq, enerjinizi artırmaq və ili arzularınıza uyğun başlamaq üçün aşağıdakılar məsləhət görülür:

Yuxu rejiminizi bərpa edin

Əvvəlcə yuxu rejiminizi qaydaya salmaqdan başlayın, çünki bu olmadan həyatınızın digər sahələrini tənzimləmək mümkün deyil. Razılaşın ki, özünüzü yorğun və halsız hiss edirsinizsə, vacib məsələləri həll etmək çətindir. Normal yuxu rejimi ən azı 7 saat gecə istirahətini əhatə etməli, yatmaq isə saat 23:00-dan gec olmamalıdır.

Əvvəlcə özünüzü tez yatmağa məcbur etmək çətin olacaq, lakin filmlər izləməkdən və sosial şəbəkələrdə vaxt keçirməkdən çəkinməyə çalışın. Tez yuxuya gedə bilməsəniz belə, qaranlıqda bir az uzanın və gözlərinizə dincəlmək üçün imkan verin. Tədricən, orqanizminiz müəyyən bir yuxu rejiminə öyrəşəcək və axşamlar özünüzü yuxulu hiss etməyə başlayacaqsınız.

Özünüzə istirahət etməyə imkan yaradın

Düşünürsünüz ki, Yeni il gecəsində yaxşıca istirahət etmisiniz? Əslində belə deyil. Çoxları razılaşar ki, hətta bir həftə keçsə də, hələ də özlərini əzgin və gücsüz hiss edir və planlaşdırılmış işləri yerinə yetirə bilmir. Bayramlar əslində yorucu olur, çünki orqanizmimiz yorulur və stresə düşür. Elə buna görə də səs-küylü əyləncələrdən sonra iş rejiminə qayıtmaq çətindir.

Bəs "istirahətdən sonra istirahət" necə olur? Həftəsonu ən zəruri işlərdən başqa heç nə planlaşdırmayın. Özünüzə evdə heç bir iş görmədən vaxt keçirməyə imkan yaradın. Meditasiya edin, divanda uzanın və ya öz-özünüzlə evin ətrafında kiçik bir gəzinti edin. Eyni zamanda, 48 saatlıq bir informasiya vakuumu yaradaraq özünüzə sakitlik və dinclik bəxş edin. İnanın, şənbə axşamına qədər özünüzü tamamilə dincəlmiş və iş məsələlərinə qayıtmağa hazır hiss edəcəksiniz.

Fiziki hərəkətlər edin

Televizor qarşısında idman etməyə, pres etməyə, plankada dayanmağa və qaçmağa söz verməyin, bu, işləməyəcək! Əgər hələ də müntəzəm olaraq idmanla məşğul olmursunuzsa, deməli, "başlamaq üçün o gün" heç vaxt gəlməyəcək. Amma vəziyyət ümidsiz deyil. Xüsusi bir gün seçmək əvəzinə, məşqləri növbəti həftə üçün qrafikinizə daxil edin.

Bundan əlavə, hətta karantin şəraitində olsa belə, mümkün qədər çox hərəkət etməyə çalışın. Məsələn, dişlərinizi fırçalayarkən oturub-durun, mikrodalğalı sobada yeməyi qızdırarkən plankada dayanın və ya yataqdan qalxmazdan əvvəl nəfəs hərəkətləri edin. Gündə 10-15 dəqiqə ərzində fiziki hərəkət etmək üçün həmişə vaxt tapmaq olar. Mütəxəssislər qeyd edir ki, belə bölünmüş fiziki aktivlik bir saatlıq fasiləsiz məşqlə müqayisədə heç də pis deyil.

Qidalanma rejiminizə dönün

Bu məsləhət sadə görünsə də, həyata keçirmək daha çətindir. Dadlı və kalorili yeməklər yemək vərdişi adətən bayramla birlikdə bitmir. Evdəki salatlar çoxdan tükənmiş ola bilər, lakin pizza, suşi və ya kartofla hamburger sifariş etmək cazibəsi qalır.

Normal qidalanmaya qayıtmaq üçün növbəti həftənin menyusunu hazırlayın və lazım olan ərzaqları evə sifariş edin. Əgər bayram yeməklərindən sonra sadə sıyıqlar və buxarda bişmiş tərəvəzlər yemək istəmirsinizsə, özünüz üçün yeni bir şey hazırlayın. Bu, həm hazır yeməklərə alışqanlığınızı unutmağa, həm də yeni dadlar kəşf etməyə kömək edəcək.

Şirniyyatdan imtina edin

Əgər daha əvvəl şəkəri qida rasionunuzdan çıxarmağa çalışmısınızsa, lakin Yeni il yenidən sizi şirin tələyə salıbsa, ən yaxşısı evdən bütün şirniyyatları ən azı bir ay müddətinə uzaqlaşdırmaqdır. Şirniyyat və şokolad almayın, hətta cazibə çox güclü olsa belə. Bir az sonra adi miqdarınıza dönə bilərsiniz, lakin hazırda orqanizmi şəkərdən təmizləmək lazımdır.

Sağlam həyat tərzini başlamaq həmişə çətindir, baxmayaraq ki, bu bizim sağlamlığımıza, əhvalımıza və rifahımıza müsbət təsir göstərir. Amma gecələr saat 3-ə qədər oyaq qalmaq, fastfud yemək və əhəmiyyətsiz şeylərə baxmaq çox asandır. Fakt budur ki, özümüzü yığışdırıb dəyişə bilən yalnız biz özümüzük!