BDU və ICESCO-nun təşkilatçılığı ilə Beynəlxalq konfrans keçirilir - FOTO

 

Əvvəlcə Dövlət himni səsləndirilib. Ümummilli Lider Heydər Əliyevin və torpaqlarımızın azadlığı uğrunda həlak olan şəhidlərimizin əziz xatirələri bir dəqiqəlik sükutla yad edilib.

 

Moderator.az xəbər verir ki, açılış mərasimində çıxış edən BDU-nun rektoru Elçin Babayev bildirib ki, 105 yaşlı Bakı Dövlət Universiteti Azərbaycanın ilk ali təhsil müəssisəsi və elm məbədi kimi elmi-tədqiqat fəaliyyətlərinin təşkili və inkişafında mühüm rol oynayıb. Universitetin fəaliyyətində elmi araşdırmaların təşkili, müasir tələblərə cavab verən infrastrukturun qurulması və beynəlxalq əməkdaşlığın genişləndirilməsi prioritet istiqamətlərdən biridir. BDU-da elmi tədqiqatların effektiv təşkili üçün müasir laboratoriyalar, elmi mərkəzlər və institutlar fəaliyyət göstərir. Məhz buna görə də BDU elmi tədqiqatların təşkili və inkişafı sahəsində öz lider mövqeyini qoruyub saxlayır. BDU-nun bu uğurlarında beynəlxalq əməkdaşlığın, xüsusilə də ICESCO ilə qurulan əlaqələrin xüsusi yeri var: “ICESCO-nun dəstəyi ilə yaradılmış Biotibbi materiallar kafedrası elmi tədqiqat fəaliyyətlərində önəmli bir mərkəz kimi formalaşıb. Bu kafedranın fəaliyyəti çərçivəsində həyata keçirilən tədqiqatlar biomaterialların tibbi tətbiqləri, müasir texnologiyaların insan sağlamlığına və ekoloji problemlərin həllinə inteqrasiyası sahəsində böyük nəticələr əldə etməyə imkan yaradıb”.

 

Rektor diqqətə çatdırıb ki, BDU ilə ICESCO arasında əməkdaşlıq çərçivəsində biotibbi materiallar və digər qabaqcıl texnologiyalar sahəsində beynəlxalq səviyyəli tədqiqatların aparılması, tələbə və gənc alimlərin ICESCO-nun təşkil etdiyi təcrübə proqramlarında iştirakının təmini, regionda müasir elmi texnologiyaların tətbiqini təşviq edən layihələrin həyata keçirilməsi, xüsusilə də ekoloji problemlərin həlli və dayanıqlı inkişaf məqsədlərinə nail olmaq üçün birgə təşəbbüslərin reallaşdırılması, ICESCO-nun dəstəyi ilə beynəlxalq konfransların keçirilməsi və yüksək impakt faktorlu elmi jurnallarda birgə məqalələrin dərc edilməsi istiqamətlərində yeni layihələrin həyata keçirilməsi nəzərdə tutulur. Bu layihələr arasında regional elmi mərkəzlərin şəbəkələşməsi və dayanıqlı inkişaf üçün innovativ texnologiyaların tətbiqi xüsusi yer tutur. Bundan əlavə, BDU təhsil və mədəniyyət sahələrində də ICESCO ilə əməkdaşlığı dərinləşdirmək, xüsusilə mədəni irsin qorunması, təhsildə rəqəmsal texnologiyaların tətbiqi və gənc nəslin qlobal çağırışlara uyğun olaraq yetişdirilməsi istiqamətlərində yeni imkanlar üzərində çalışır: “ICESCO ilə əməkdaşlığın dərinləşdirilməsi təkcə BDU-nun deyil, ümumilikdə Azərbaycanın elmi və təhsil potensialının güclənməsinə mühüm töhfə verəcək. İnanıram ki, birgə səylərimiz nəticəsində elm, təhsil və mədəniyyət sahəsində daha böyük uğurlara imza atacağıq”.

 

Elçin Babayev bildirib ki, Azərbaycanda elmin təşkilində müasir yanaşmaların tətbiqi mühüm əhəmiyyət kəsb edir. Universitetlərin elmi tədqiqat mərkəzləri kimi inkişaf etdirilməsi və tələbələrin elmi fəaliyyətə cəlb olunması elm və təhsil inteqrasiyasını gücləndirir. Rektor bu baxımdan Azərbaycanla yanaşı, Türkiyədən, Qazaxıstandan, Bolqarıstandan da nümayəndələrin iştirak etdiyi “Biotibbi və ekoloji problemlərin həlli üçün qabaqcıl materiallar” mövzusunda Beynəlxalq konfransın və “Yaşıl və davamlı elm və tədris üzrə I BDU Məktəbi”nin faydalı olacağını bildirib.

 

Sonra ICESCO Baş direktorunun elm və texnologiyalar üzrə müşaviri Məhəmməd Şərifin videomüraciəti dinlənilib.

 

İzmir Yüksək Texnologiyalar İnstitutunun rektoru Yusuf Baran son onilliklərdə universitetlərin elm, bilik öyrətməklə yanaşı, texnologiyaların, iqtisadi inkişafın əsasını qoyan mərkəzlər olduğunu qeyd edib. Xüsusilə sənaye inqilablarının dünyanın sürətlə dəyişməsində böyük rol oynadığını, universitetlərin isə bu inkişafın önündə getdiyini vurğulayıb. O, biotibb istiqamətində tədqiqatların qlobal ekoloji problemlərin həllində mühüm rola malik olduğunu bildirib, konfransın işinə uğurlar arzulayıb.

 

Azərbaycan Milli Elmlər Akademiyasının vitse-prezidenti, Molekulyar Biologiya və Biotexnologiyalar İnstitutunun baş direktoru, akademik İradə Hüseynova, Sumqayıt Dövlət Universitetinin rektoru Rüfət Əzizov, Azərbaycan Tibb Universitetinin beynəlxalq əlaqələr üzrə prorektoru Orxan İsayev, Bolqarıstanın Stefan Angelof adına Mikrobiologiya İnstitutunun professoru Milka Mileva, Qazaxıstanın Almatı Texnoloji Universitetinin Biotexnologiya kafedrasının müdiri Şolpan Abzxanova, Türkiyənin Yaşar Universitetinin Kənd təsərrüfatı bilikləri və texnologiyaları fakültəsinin dekanı İsmayıl Türkan çıxışlarında “Biotibbi və ekoloji problemlərin həlli üçün qabaqcıl materiallar” mövzusunda Beynəlxalq konfransın və “Yaşıl və davamlı elm və tədris üzrə I BDU Məktəbi”nin iqlim dəyişiklikləri, ekoloji problemlərin həlli, biotibbin inkişafı ilə bağlı qlobal çağırışlara cavab verdiyini, müxtəlif ölkələrin universitetləri, xüsusilə gənc tədqiqatçıları arasında əməkdaşlıq əlaqələrinin qurulması və təcrübə mübadiləsi baxımından faydalı olduğunu bildiriblər.

 

Konfransın plenar sessiyasında İzmir Yüksək Texnologiyalar İnstitutunun rektoru Yusuf Baranın “Xərçəng xəstəliyində dərmana qarşı davamlılıq” və BDU-da ICESCO-nun Biotibbi materiallar kafedrasının müdiri, professor Ülviyyə Həsənovanın “ICESCO-nun Biotibbi materiallar kafedrası: beynəlxalq əməkdaşlıq əsasında elm və tədqiqatlar” mövzularında məruzələri dinlənilib.

 

Konfrans öz işini bölmə iclasları ilə davam etdirir.