Azərbaycan mühəndisləri yüksək tələblərə uyğun kosmik peyk hazırlayacaq

Yaxın illərdə azərbaycanlı mühəndislər ən peşəkar, ən yüksək tələblərə cavab verən kosmik peyklər hazırlayacaqlar.

Bunu Rəqəmsal İnkişaf və Nəqliyyat Nazirinin müavini Saməddin Əsədov Ümumdünya Mühəndislik Günü ilə bağlı keçirilən tədbirdə deyib.

Onun sözlərinə görə, gələcək illərdə Azərbaycan dövləti daha çox yeni kosmik layihələr həyata keçirəcək: “Azərbaycanda kosmik sahədə mühəndislərin yetişdirilməsi istiqamətində əhəmiyyətli fəaliyyət həyata keçirilir. Bunun nəticəsində bu gün Azərbaycan artıq regional deyil, qlobal miqyasda kosmik sahədə böyük nüfuza malikdir. Ölkəmiz çoxsaylı kosmik layihələrdə və beynəlxalq proqramlarda iştirak edir. Azərbaycanda qlobal miqyaslı tədbirlər keçirilir və bu il də bu tədbirlər davam etdiriləcək. Azərbaycan orbitdə kosmik mövqeti olan azsaylı dövlətlərdən biridir”.

O bildirib ki, yaxın illərdə Azərbaycanlı mühəndislər ən peşəkar, ən yüksək tələblərə cavab verən kosmik peyklər hazırlayacaq: “İnanıram ki, 5-10 il ərzində biz sizinlə Ay, Mars və daha böyük kosmik proqramları haqqında müzakirələr aparacağıq”.