Fransa və İspaniya ön planda: futbol üzrə dünya çempionatının favoritləri açıqlandı - "The New York Times"

Bizi sosial şəbəkələrdən izləyin:

Ekspertlər dünya çempionatının əsas favoritlərini, mümkün sürprizlərini və məyusluq yarada biləcək komandalarını müəyyənləşdirib...

Futbol ekspertləri qarşıdan gələn dünya çempionatı ilə bağlı proqnozlarını bölüşüb.

Moderator.az xəbər verir ki, bu barədə "nyt.com" nəşri yazıb.

Favoritlər Fransa və İspaniyadır

Nəşrin 11 idman müəllifinin böyük əksəriyyəti dünya çempionluğuna əsas namizədlər kimi Fransa və İspaniya yığmalarını göstərib. Ekspertlər Fransa millisinin güclü heyətə və böyük turnirlər təcrübəsinə malik olduğunu vurğulayırlar.

Xüsusi ümidlər isə hücumçu Kylian Mbappeyə bağlanır. Digər əsas favorit isə Avropa çempionu İspaniyadır. Analitiklər hesab edirlər ki, komandanın balanslı oyunu, güclü yarımmüdafiə xətti və gənc ulduz Lamin Yamal turnirin taleyini həll edə bilər.

Kimlər sürpriz edə bilər?

Ekspertlərin fikrincə, Ekvador, Seneqal, Kot-d'İvuar, Norveç və Meksika turnirin əsas sürpriz komandaları ola bilər. Xüsusilə Norveçin hücum xətti və Ekvadorun etibarlı müdafiəsi diqqət çəkir. Meksika isə ev sahibi amilindən yararlana biləcək komandalar arasında göstərilir. Bir çox ekspert hesab edir ki, meksikalılar doğma azarkeşlərin dəstəyi ilə gözləniləndən daha uzağa gedə bilərlər.

Məyusluq yarada biləcək komandalar

Sorğuda iştirak edən müəlliflərin bir hissəsi son dünya çempionu Argentinanın titulunu qoruya bilməyəcəyini düşünür. Onların fikrincə, komanda əvvəlki illərlə müqayisədə zəifləyib və artıq Lionel Messi əvvəlki səviyyəsində deyil. Bəzi ekspertlər Braziliya və İngiltərənin də gözləntiləri doğrultmaya biləcəyini qeyd edirlər. Bununla yanaşı, Norveçin debüt təzyiqi altında çətinlik çəkə biləcəyi barədə fikirlər də səsləndirilib.

Turnirin əsas ulduzları

"Qızıl buts" uğrunda mübarizədə əsas favorit kimi Mbappe göstərilir. Alternativ namizədlər sırasında Erlinq Holand, Harri Keyn və Romelu Lukaku da qeyd olunur. Turnirin ən yaxşı futbolçusu adına əsas namizədlər isə Yamal, Mbappe və Fransanın digər ulduzu Maykl Olise hesab edilir.

Ekspertlərin ümumi qənaətinə görə, 2026-cı ilin dünya çempionatının əsas favoriti Fransa olsa da, İspaniya, İngiltərə və Portuqaliya da kubok uğrunda ciddi mübarizə aparacaq. Turnirin əsas intriqalarından biri isə Lamin Yamalın dünya futbolunun yeni lideri kimi özünü təsdiqləyib-təsdiqləyə bilməyəcəyi olacaq.