"Kürd kartı": Trampın gizli planı və baş tutmayan ssenari" - "Fox News"

Bizi sosial şəbəkələrdən izləyin:

"ABŞ və İsrailin İrana qarşı riskli strategiyası ifşa olunur..."

ABŞ prezidenti Donald Trampın birbaşa açıqlamaları və İsrail mediasının araşdırmaları Vaşinqton və Təl-Əvivin İran rejimini sarsıtmaq üçün hazırladığı genişmiqyaslı və riskli strategiyanın detallarını üzə çıxarır.

Moderator.az xəbər verir ki, bu barədə "Fox News" nəşri yazıb.

Gizli planın mərkəzində kim dayanırdı?

Nəşr yazır ki, bu planın əsasını "kürd kartı" təşkil edirdi. Məqsəd kürd silahlı birləşmələrindən istifadə etməklə Tehranda hakimiyyət dəyişikliyinə

nail olmaq idi. "Fox News"-a verdiyi 15 dəqiqəlik eksklüziv telefon müsahibəsində Tramp ilk dəfə açıq şəkildə etiraf edib ki, Vaşinqton son etiraz dalğaları zamanı İrandakı nümayişçilərə "böyük həcmdə silah" göndərib. Onun sözlərinə görə, bu əməliyyatın əsas logistika kanalı məhz kürd qüvvələri olub.

Lakin Tramp nəticədən narazı qaldığını da gizlətməyib: o bildirib ki, göndərilən silahların bir hissəsi nümayişçilərə çatmayıb və kürd qrupları tərəfindən saxlanılıb. Bu açıqlama onun daha əvvəl "Truth Social" platformasında yazdığı və "iranlı vətənpərvərləri" dövlət institutlarını ələ keçirməyə çağırdığı müəmmalı paylaşımı ilə üst-üstə düşür.

Diplomatik təzyiq, gizli danışıqlar və hərbi eskalasiya

"Axios" nəşrinin yazdığına görə, bu strategiyanın arxasında aylarla davam edən gizli diplomatik təzyiq dayanırdı. Bu xəttin əsas təşəbbüskarlarından biri isə İsrailin baş naziri Benyamin Netanyahu olub. O, Ağ Evi kürdlərin genişmiqyaslı üsyanı başlada və nəticədə İran rejimini çökdürə biləcəyinə inandırmağa çalışıb.

Bu məqsədlə fevralın 28-də Tramp İraq kürdlərinin liderləri - Məsud Bərzani və Bafel Talabani ilə birbaşa telefon danışıqları aparıb. Mənbələr bu əlaqələri "son dərəcə həssas" kimi xarakterizə edir.

Danışıqlar davam etdiyi vaxt vəziyyət sürətlə hərbi qarşıdurmaya çevrildi. Martın əvvəlinə qədər ABŞ və İsrailin İrana qarşı birgə kampaniyası pik həddə çatdı. Cavab olaraq Tehran İraq Kürdüstanındakı hədəflərə pilotsuz uçuş aparatları ilə zərbələr endirdi.

Baş tutmayan hücum və etimad böhranı

Planın ən iddialı hissəsi isə quru əməliyyatı idi. Ssenariyə əsasən, İrandakı altı müxtəlif kürd fraksiyasından on minlərlə silahlı döyüşçü İraq ərazisindən sərhədi keçərək, ABŞ və İsrailin güclü hava dəstəyi ilə hücuma başlamalı idi.

Lakin bu plan son anda dayandırıldı. Səbəblər arasında məlumat sızması, Vaşinqtonun regional müttəfiqlərinin təzyiqi və kürd liderlərinin özlərinin qəfil tərəddüdləri göstərilir.

Bunun ardınca Tramp ritorikasını dəyişməyə məcbur qaldı. O, artıq kürdlərin "əziyyət çəkməsini və ya həlak olmasını istəmədiyini" bildirdi və onları birbaşa münaqişəyə cəlb etmək niyyətində olmadığını açıqladı.

Buna baxmayaraq, həm İranda, həm də İraqda fəaliyyət göstərən kürd siyasi təşkilatları ABŞ-dan hər hansı yardım aldıqlarını qəti şəkildə inkar edir. Onlar silahlarının ya illər əvvəl ələ keçirilmiş ehtiyatlar, ya da qara bazardan alınmış vasitələr olduğunu bildirirlər. Kürd liderləri vurğulayır ki, onların əsas məqsədi silahlı qarşıdurma deyil, vətəndaş etirazıdır.

Hazırkı mərhələdə vəziyyət çıxılmaz nöqtəyə çatıb. Trampın etirafları Tehranın xarici müdaxilə ilə bağlı şübhələrini gücləndirib. Digər tərəfdən, planlaşdırılan quru əməliyyatının ləğvi və kürd liderlərinin təkzibləri bu mürəkkəb geosiyasi düyündə müttəfiqlər arasında ciddi etimad böhranının yarandığını göstərir.