"Rusiyanın zərbə taktikasında dəyişiklik: daha uzun və daha geniş hücumlar" - ISW

Bizi sosial şəbəkələrdən izləyin:

"Moskva yeni mərhələdə HHM-ni zəiflətməyə çalışır..."

Martın 23-24-də Ukraynaya edilən hücumlar Rusiyanın zərbə taktikasında mühüm dəyişiklikdir.

Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) analitikləri yazıb.

ISW bildirir ki, yeni yanaşma daha uzunmüddətli hücumlar aparmağa və daha geniş əraziləri, xüsusilə mülki zonaları hədəfə almağa imkan verir. Analitiklərə görə, hücumların uzadılması Ukraynanın HHM sistemində zəif nöqtələri aşkar edib onları sıradan çıxarmaq məqsədi daşıyır.

Rusiya əvvəlcə az sayda raket buraxaraq ehtiyat toplayır, daha sonra isə kütləvi şəkildə raket və dronlarla zərbə endirərək maksimum ziyan vurmağa çalışır. Eyni zamanda, uzaqmənzilli dronların əvvəlcədən toplanaraq müəyyən anda istifadəsi də bu strategiyanın əsas hissəsidir. ISW qeyd edir ki, Moskva gələcəkdə minlərlə PUA ilə hücumlar planlaşdırır və son zərbələr bu istiqamətdə ciddi addım hesab olunur.

Enerji və mülki obyektlər hədəfdə qalır

Son hücumlar zamanı Ukraynaya bir sutkada yüzlərlə dron buraxılıb, zərbələr Lvov, Ternopol, İvano-Frankovsk və Vinnitsa kimi şəhərlərə dəyib. Ukrayna prezidenti Vladimir Zelenski hücumların geniş coğrafiyanı əhatə etdiyini, 40-dan çox yaralının olduğunu və ölənlərin də qeydə alındığını bildirib.

ISW vurğulayır ki, bu vəziyyət Ukraynanın HHM imkanlarının gücləndirilməsini zəruri edir. Xüsusilə "Patriot missile system" kimi sistemlər bu baxımdan kritik əhəmiyyət daşıyır. Rusiya isə qlobal çatışmazlıq və beynəlxalq vəziyyətdən istifadə edərək hücumlarını daha da genişləndirməyə çalışır.