"Tramp İranla müharibənin bitməsindən danışır - amma ziddiyyət qalır" - "Sky News"

Bizi sosial şəbəkələrdən izləyin:

"Qələbə" ritorikası ilə geri çəkilmə siqnalları üst-üstə düşmür, eskalasiya riski isə hələ də yüksəkdir..."

ABŞ prezidenti Donald Trampın İranla müharibə ilə bağlı ritorikası son günlər həm sərtləşib, həm də ziddiyyətli xarakter alıb.

Moderator.az xəbər verir ki, bu barədə "Sky News" nəşri yazıb.

"Biz qalib gəldik" - sərt ritorika və qəti mövqe

Nəşrin jurnalisti Mark Stoun xəbərdarlıq edir ki, Vaşinqtonun hərbi əməliyyatları dayandırmağa hazır olduğu barədə siqnallara ehtiyatla yanaşmaq lazımdır. Tramp əvvəlcə Ağ Evdə çıxış edərək ABŞ-ın tam hərbi üstünlük əldə etdiyini iddia edib. Onun sözlərinə görə, İranın donanması, hava qüvvələri və HHM sistemi demək olar ki, məhv edilib. Eyni zamanda o, açıq şəkildə bildirib ki, atəşkəsə ehtiyac görmür: "Siz qarşı tərəfi faktiki olaraq məhv edərkən atəşkəs bağlamırsınız".

Birdən dəyişən ton: müharibəni dayandırmaq siqnalı

Lakin cəmi bir saat sonra, "Air Force One" təyyarəsində jurnalistlərlə söhbətdə Tramp tamam fərqli mesaj verib. O bildirib ki, ABŞ məqsədlərinə çox yaxındır və genişmiqyaslı hərbi əməliyyatların "mərhələli şəkildə dayandırılması" variantı nəzərdən keçirilir. Onun sözlərinə görə, ABŞ artıq İranın raket potensialını zəiflədib, hərbi-sənaye bazasını dağıdıb və regiondakı müttəfiqlərini qoruyub. Bu müttəfiqlər sırasında Israil, Saudiyyə Ərəbistanı, Qətər, Birləşmiş Ərəb Əmirlikləri, Bahreyn və Küveyt qeyd olunur.

Problem qalır: nüvə riski və yeni eskalasiya ehtimalı

Bununla belə, Mark Stoun vurğulayır ki, əsas problem - İranın nüvə potensialı tam aradan qalxmayıb. Nüvə materiallarının hələ də ölkə daxilində qalması ehtimalı yüksəkdir. Üstəlik, İran rejimi zəifləsə də, yox olmayıb və cavab addımları ata bilər. Bu, xüsusilə asimmetrik hücumlar və "yatmış" şəbəkələr vasitəsilə özünü göstərə bilər.

Trampın Hörmüz körfəzi ilə bağlı açıqlaması da diqqət çəkir. Onun mesajı belə şərh olunur: ABŞ enerji bazarına zərbə vurub və indi onun bərpası digər ölkələrin problemidir. Nəticədə, səsləndirilən "qələbə" bəyanatlarına və müharibənin bitə biləcəyi ilə bağlı siqnallara baxmayaraq, vəziyyət qeyri-sabit olaraq qalır. Regiona əlavə ABŞ qüvvələrinin göndərilməsi isə göstərir ki, risklər hələ də yüksəkdir.