"Ukrayna dəniz müharibəsinin qaydalarını yenidən yazdı" - Hikmət Cavad

Bizi sosial şəbəkələrdən izləyin:

"Bəzi siyasi bəyanatlar artıq faktlara deyil, illüziyaya əsaslanır..."

Donald Trampın "dəniz kamikadze dronları mövcud deyil" barədə açıqlaması, sadəcə, qəribə deyil - bu, açıq reallığın inkarıdır.

Moderator.az xəbər verir ki, bu barədə "Ukrayna azərbaycanlılarının birləşmiş diasporu" Ümumukrayna ictimai təşkilatının sədri Hikmət Cavad "gordonua.com" nəşrində yazıb.

"Mövcud olmayan silahlar" və açıq-aşkar reallıq

Halbuki dünya artıq bir neçə ildir ki, bu texnologiyaların mövcudluğunu və tətbiqini müşahidə edir. Müəllif qeyd edir ki, İran rejimini tənqid etmək tam əsaslıdır. Bu sistem daxildə repressiyalar aparır, regionda radikal qüvvələri dəstəkləyir. Lakin bu tənqid absurda çevrilməməlidir.

İranın belə texnologiyalara malik olmadığını iddia etmək ümumiyyətlə pilotsuz aparatların mövcudluğunu inkar etmək qədər məntiqsizdir. İran uzun müddətdir "asimmetrik müharibə" strategiyasına üstünlük verir və bu çərçivədə ucuz, lakin effektiv silah sistemləri inkişaf etdirir. Dəniz kamikadze dronları da bu strategiyanın məntiqi davamıdır.

Ukrayna müharibəsi: dəniz döyüşlərinin yeni siması

Müəllif vurğulayır ki, bu texnologiyaların real təsirinin ən aydın sübutu Rusiya-Ukrayna müharibəsidir. Ukrayna dəniz müharibəsinin qaydalarını faktiki olaraq yenidən yazaraq kiçik, sürətli və partlayıcılarla yüklənmiş pilotsuz katerlərdən geniş istifadə edib.

Məhz bu vasitələrlə Sevastopol limanına və Krımdakı hərbi infrastruktura zərbələr endirilib. Nəticədə Rusiya Qara dəniz donanması ciddi itkilər verib və donanmanın böyük hissəsini geri çəkməyə məcbur olub.

Bu nəticə böyük donanmaların toqquşması ilə deyil, yeni texnologiyaların, konkret olaraq dəniz dronlarının tətbiqi ilə əldə olunub. Müasir müharibə artıq dəyişib və ucuz texnologiyalar milyardlarla dəyəri olan hərbi sistemlərə zərbə vura bilir.

Siyasi reallıq və Ukraynanın dirənişi

Məqalədə qeyd olunur ki, problem yalnız bir bəyanatla məhdudlaşmır. Ukrayna təkcə Rusiya ilə müharibə aparmır, eyni zamanda bəzən Kremlin maraqlarına xidmət edən beynəlxalq ritorika ilə də üzləşir.

Bəzi Qərb ölkələri açıq şəkildə Ukraynaya qarşı sərt mövqe tutur, digərləri isə "neytrallıq" adı altında kompromis çağırışları edir. Lakin bu güzəştlər əksər hallarda təcavüzkara deyil, hücuma məruz qalan tərəfə - Ukraynaya yönəlir.

Bu şəraitdə Ukraynanın müqaviməti artıq təkcə hərbi deyil, həm də tarixi hadisəyə çevrilir. Müəllifin fikrincə, gələcəkdə bu dövr, bütün çətinliklərə baxmayaraq, bir ölkənin necə ayaqda qala bildiyinin nümunəsi kimi öyrəniləcək. Bu, həm də bir həqiqətin sübutudur: reallığı inkar etmək onu dəyişmir.