"Rusiya Macarıstan seçkilərinə təsir etməyə çalışır" - "Deutsche Welle"

Bizi sosial şəbəkələrdən izləyin:

"Qərb mediası və müxalifət Kremlin Viktor Orbana dolayı dəstək verdiyini iddia edir, Budapeşt isə bu ittihamları rədd edir..."

Macarıstanda qarşıdan gələn parlament seçkiləri ərəfəsində Rusiyanın prosesə mümkün müdaxiləsi ilə bağlı iddialar getdikcə artır.

Moderator.az xəbər verir ki, bu barədə "dw.com" nəşri yazıb.

Seçkilər ərəfəsində artan şübhələr

Nəşr yazır ki, Budapeştin məşhur Andrassy Avenue prospektində yerləşən bir evdəki xatirə lövhəsi 1956-cı ildə Sovet qoşunlarının Macarıstandakı üsyanı qanla yatırmasını xatırladır. Elə həmin ərazidə yerləşən Rusiyanın Macarıstandakı səfirliyi isə bəzi mənbələrə görə seçkilər ərəfəsində Moskvanın qeyri-rəsmi fəaliyyət mərkəzlərindən birinə çevrilib.

Media və müxalifət iddia edir ki, Viktor Orban hökumətinin seçkilərdə qalib gəlməsi üçün Vladimir Putin rəhbərliyindəki Kreml dolayısı ilə dəstək göstərir. Moskva və Budapeşt isə bu ittihamları qətiyyətlə rədd edir. Buna baxmayaraq, qarşıdan gələn seçkilər ölkənin gələcək kursu - Avropa ilə yaxınlaşma, yoxsa Moskva ilə daha sıx əlaqələr barədə bir növ referendum kimi qiymətləndirilir.

Kəşfiyyat iddiaları və informasiya kampaniyası

Macarıstanın "VSquare" portalı Avropa kəşfiyyat mənbələrinə istinadla yazıb ki, Rusiyanın hərbi kəşfiyyat qurumu olan Baş Kəşfiyyat İdarəsinin əməkdaşları diplomat qiyafəsində Budapeştə göndərilib. İddiaya görə, onların məqsədi seçkilərə təsir göstərmək və Orbana üstünlük qazandırmaqdır.

Məlumatlara əsasən, bu fəaliyyətə Rusiya prezident administrasiyasının nümayəndəsi Sergey Kiriyenko nəzarət edir. Araşdırmaçı jurnalist Sabolç Panyi bildirir ki, planın əsas hissəsi sosial şəbəkələrdə kampaniyadır. Məqsəd Orbana qarşı əsas rəqib sayılan müxalif siyasətçi Peter Madyar və onun rəhbərlik etdiyi TISZA - Hörmət və Azadlıq Partiyası əleyhinə informasiya dalğası yaratmaqdır.

Britaniyanın "Financial Times" qəzeti də yazır ki, Kremlə yaxın Sosial Layihələşdirmə Agentliyi seçkilər üçün xüsusi kommunikasiya planı hazırlayıb. Sənədə görə, kampaniyanın məqsədi Orbana "güclü beynəlxalq əlaqələri olan lider", onun rəqibini isə "Brüsselin marioneti" kimi təqdim etməkdir. Eyni zamanda, Rusiyanın açıq dəstəyinin əks effekt verə biləcəyi də nəzərə alınır.

Qarşılıqlı ittihamlar və siyasi mübarizə

Macarıstan hakimiyyəti bütün bu iddiaları rədd edir. Hakim Fides - Macarıstan Vətəndaş İttifaqı partiyasının nümayəndəsi Mate Koçiş bildirib ki, belə xəbərlər əsassızdır və diqqəti başqa məsələlərdən yayındırmaq məqsədi daşıyır. O, hətta Ukraynanın seçkilərə mümkün müdaxiləsi ilə bağlı iddialar səsləndirib.

Macarıstan xarici işlər naziri Peter Siyyarto isə ölkədə saxlanılan və böyük məbləğdə pul daşıdığı bildirilən Ukrayna bankına məxsus inkassasiya maşınları ilə bağlı araşdırmaya diqqət çəkərək bu hadisənin seçkilərlə əlaqəli ola biləcəyini deyib. Ukraina isə ittihamları rədd edib.

Müxalifət lideri Peter Madyar isə əksinə, Kremlin seçkilərə müdaxilə etdiyini iddia edir və ona qarşı "rus tipli kompromat" kampaniyası aparıldığını bildirir. Analitiklər qeyd edir ki, Macarıstan hökumətinin Rusiya ilə uzun illərdir davam edən yaxın münasibətləri bu mübahisələri daha da gücləndirir. Orban 2010-cu ildən hakimiyyətdədir və enerji sahəsində Moskva ilə əməkdaşlığın davam etdirilməsini müdafiə edir.