Trampın yaxın çevrəsində İran savaşıyla bağlı parçalanma yarandı — "Reuters"

Bizi sosial şəbəkələrdən izləyin:

Ağ Ev daxilindəki mürəkkəb pərdəarxası mübarizə ABŞ prezidenti Donald Trampı İrandakı müharibənin gedişatı ilə bağlı açıqlamalarını daim dəyişdirməyə məcbur edir. Prezidentin müşavirləri bir neçə düşərgəyə bölünüb və Yaxın Şərqi getdikcə daha çox bürüyən münaqişədə qələbəni nə vaxt və necə elan etmək barədə müzakirələr aparırlar.

Moderator.az "TSN"-ə istinadla xəbər verir ki, "Reuters" bu barədə öz administrasiya mənbələrinə əsaslnaraq məlumat yayıb.

Benzin qiymətləri müharibə "şahinləri"nə qarşı...

Nəşrin məlumatına görə, Trampın iqtisadi və siyasi müşavirləri, o cümlədən onun aparat rəhbəri Suzi Uayls, prezidenti ciddi siyasi risklər barədə xəbərdar edirlər. Onlar qeyd edirlər ki, ABŞ-da neft şoku və benzin qiymətlərinin artması müharibəyə daxili dəstəyi tez bir zamanda azalda bilər. Bu rəsmilər Trampı "qələbə"ni dar mənada təyin etməyə və əməliyyatın məhdud olduğunu və başa çatmaq üzrə olduğunu bildirməyə çağırırlar.

Eyni zamanda, Ağ Evdə güclü bir "şahin" lobbisi (məsələn, senatorlar Lindsi Qrem və Tom Kotton) var və İslam Respublikasının nüvə silahı əldə etməsinin qarşısını almaq üçün ona hərbi təzyiqin davam etdirilməsini tələb edirlər.

Üçüncü qüvvə Trampın böyük populist bazasıdır (Stiv Bennon və Taker Karlson da daxil olmaqla) və onlar Yaxın Şərqdə başqa bir uzunmüddətli münaqişəyə cəlb olunmamağa çalışırlar...

"O, "qırğıların" kampaniyanın davam etdiyinə inanmasına imkan verir, bazarların müharibənin tezliklə bitəcəyinə inanmasını istəyir və onun bazası isə eskalasiyanın məhdudlaşacağına inanır", - deyə Trampın müşaviri nəşrə bildirib.

Çıxış yolu axtarışı və tez əldə olunan uğurun illüziyası...

Mənbələr qeyd edir ki, Tramp populyar olmayan münaqişədən çıxış yolu tapmağa çalışır. Bəzi müşavirlər onu inandırmağa çalışıblar ki, İran kampaniyası yanvar ayında Venesuelada Nikolas Maduronun ələ keçirilməsi ilə nəticələnən əməliyyat qədər tez və asanlıqla baş verməyəcək.

Venesueladan fərqli olaraq, İran daha dözümlü və daha yaxşı silahlanmış düşmən olduğunu sübut edib. ABŞ və İsrailin güclü zərbələri nəticəsində, o cümlədən İranın yüksək vəzifəli rəsmiləri də daxil olmaqla, təxminən 2000 nəfər həlak olub, baxmayaraq ki, Tehran Hörmüz boğazında neft tankerlərinə hücum etməyə davam edir və dünya neft tədarükünün beşdə birini bağlayır.

Əgər boğazın blokadası ABŞ-da benzin qiymətlərinin kəskin şəkildə artmasına səbəb olarsa, bu, noyabr ayında keçiriləcək aralıq seçkilərdən əvvəl Respublikaçılar Partiyasının reytinqini xilas etmək üçün müharibəyə son qoymaq üçün Trampa siyasi təzyiqi artıra bilər...

S.Laçın