"Rusiya Ukraynaya 400-dən çox hava hədəfi ilə hücum edib" - Ukrayna KİV-ləri

Bizi sosial şəbəkələrdən izləyin:

"Odessa və digər şəhərlərdə enerji infrastrukturu və yaşayış binaları zərər görüb..."

Fevralın 17-nə keçən gecə Ukrayna yenidən genişmiqyaslı hava hücumuna məruz qalıb.

Moderator.az xəbər verir ki, bu barədə "rbc.ua" nəşri məlumat yayıb.

Ukrayna Hərbi Hava Qüvvələrinin məlumatına görə, Rusiya 29 raket və 396 pilotsuz uçuş aparatı ilə ölkə ərazisinə zərbələr endirib. Hücum bir neçə istiqamətdən həyata keçirilib və müxtəlif tipli raketlərdən istifadə olunub.

Məlumata əsasən, buraxılan silahlar arasında 4 "İsgəndər-M" ballistik raketi, 20 X-101 qanadlı raketi, 4 "İsgəndər-K", həmçinin 1 X-59/69 idarəolunan aviasiya raketi olub. Bundan əlavə, əsasən "Shahed" tipli olmaqla yüzlərlə zərbə PUA-sı tətbiq edilib.

Hücumun əsas zərbəsi - Odessa

Zərbələrin ən ciddi nəticələri Odessada qeydə alınıb. Şəhər hərbi administrasiyasının rəhbərliyi bildirib ki, gecə ərzində hava həyəcanı 6 dəfə elan edilib. Hücum nəticəsində enerji infrastrukturu və mülki obyektlər zədələnib.

Şəhərin müxtəlif rayonlarında yanğınlar baş verib. 25 mərtəbəli yaşayış binasının yuxarı mərtəbəsində mənzil və ümumi istifadə sahələri zərər görüb. Avtoservis, anbar, mağazalar və qarajlar alovlanıb, bir neçə avtomobil yanaraq yararsız hala düşüb.

Ümumilikdə onlarla xilasedici hadisə yerində çalışıb. Rəsmi məlumatlara görə, azı üç nəfər yaralanıb. Onlardan biri ağır vəziyyətdə xəstəxanaya yerləşdirilib. Zərbələr nəticəsində bəzi ərazilərdə elektrik, su və istilik təchizatında fasilələr yaranıb.

HHM-in fəaliyyəti və nəticələr

Ukrayna tərəfinin açıqlamasına görə, HHM qüvvələri 392 hava hədəfini məhv edib və ya zərərsizləşdirib. Bütün qanadlı raketlərin vurulduğu bildirilsə də, 4 ballistik raketin və 18 PUA-nın hədəflərə çatdığı qeyd olunur. Zərbələr 13 müxtəlif məkanda dağıntılara səbəb olub.

Dnepr şəhərində də yanğın və inzibati binanın zədələnməsi faktı təsdiqlənib. İlkin məlumata görə, orada xəsarət alan yoxdur. İvano-Frankovsk vilayətinin Burştın şəhərində isə hücumdan sonra bəzi yaşayış məntəqələri istilik və isti su təchizatından məhrum qalıb.

Eyni zamanda, Rusiya Müdafiə Nazirliyi öz növbəsində ölkə üzərində 76 Ukrayna PUA-sının məhv edildiyini açıqlayıb. Bir sıra Rusiya şəhərlərində hava limanlarının fəaliyyəti müvəqqəti dayandırılıb.