"Ukraynaya gecə hücumu: Odessa, Xarkov və Dnepropetrovsk vilayətləri hədəfdə" - Ukrayna KİV-ləri

Bizi sosial şəbəkələrdən izləyin:

"Rusiya ordusu 9 fevral gecəsi raket və kamikadze dronlarla genişmiqyaslı hücum həyata keçirib, ölən və yaralananlar var..."

Rusiya ordusu 9 fevral gecəsi Ukraynaya qarşı bir neçə istiqamətdən genişmiqyaslı hava hücumu həyata keçirib.

Moderator.az xəbər verir ki, bu barədə "rbc.ua" nəşri məlumat yayıb.

Kütləvi hücumun miqyası və HHM-in işi

Hücum zamanı Bryansk vilayətindən 11 ədəd "İsgəndər-M" ballistik raketi, həmçinin 149 zərbə dronu - "Shahed", "Gerbera", "İtalmas" və digər PUA-lar buraxılıb. Raket və dronlar Rusiya ərazisindən və müvəqqəti işğal olunmuş bölgələrdən olmaqla yeddi istiqamətdən havaya qalxıb.

Hava hücumundan müdafiə qüvvələri hücumun böyük hissəsini zərərsizləşdirib. Saat 09:30-a olan məlumata görə, HHM 116 zərbə dronunu vurub və ya sıradan çıxarıb. Bununla belə, 23 dron və bir neçə raket 15 nöqtədə hədəfə dəyib, altı ərazidə isə qalıqların düşməsi qeydə alınıb.

Odessada ölən var

Qara dəniz istiqamətindən gələn kamikadze dronlar Odessanı hədəf alıb. Şəhərdə gecə yarısı hava həyəcanı elan olunub, güclü partlayışlar və HHM atəşi eşidilib. Odessa şəhər administrasiyasının rəhbəri Sergey Lısakın sözlərinə görə, hücum nəticəsində yaşayış binaları və kommunikasiyalar zərər görüb, çoxmərtəbəli binanın damında yanğın baş verib, qaz kəməri zədələnib.

Dəqiqləşdirilmiş məlumata əsasən, 35 yaşlı kişi həlak olub, iki nəfər, o cümlədən 19 yaşlı qız yaralanıb. Primorsk rayonunda 21 mənzil zədələnib, 57 pəncərə sınıb. İki avtomobil yanıb, daha altısı zərər görüb. Fövqəladə xidmətlər nəticələrin aradan qaldırılması ilə məşğuldur, sakinlər "Bərpa" proqramı üzrə kompensasiya üçün müraciət edə bilirlər.

Xarkov və Dnepropetrovsk vilayətlərində hücumlar

Xarkov vilayətinin Boqoduxov şəhərində Rusiya dronu yaşayış evinə düşüb. Nəticədə bina tamamilə dağılıb, yanğın baş verib. Dağıntılar altından bir qadının və 10 yaşlı oğlanın cəsədləri çıxarılıb, üç nəfər yaralanıb.

Dnepropetrovsk vilayətində Şaxtyorsk istiqamətində PUA hücumu nəticəsində doqquz nəfər xəsarət alıb, onların arasında 13 yaşlı qız da var. Bir neçə yaşayış binasında yanğın və dağıntılar qeydə alınıb. Nikopol istiqamətində artilleriya və FPV-dronlarla zərbələr endirilsə də, mülki itkilər olmayıb.