"Sənədsiz sən hətta dəvə də deyilsən": Səudiyyə Ərəbistanı hər "səhra gəmisinə" pasport verəcək - "Əl-İhbariyyə"

Bizi sosial şəbəkələrdən izləyin:

Krallıqda 2,2 milyon dəvənin şəxsiyyətini təsdiqləyən sənəd çap olunacaq...

Səudiyyə Ərəbistanı krallıq ərazisində yaşayan milyonlarla dəvə üçün rəsmi pasportların verilməsini planlaşdırır.

Moderator.az xəbər verir ki, bu barədə Səudiyyə Ərəbistanın "Əl-İhbariyyə" telekanalı məlumat verib. Məlumatı "mir24.tv" nəşri yayıb.

Hakimiyyət bu addımla ölkənin milli "səhra donanması"nı tam uçota almağı və dəvəçiliyi sistemli şəkildə nəzarət altına götürməyi hədəfləyir. Ətraf mühit, su ehtiyatları və kənd təsərrüfatı nazirliyinin açıqlamasına görə, təşəbbüs sahənin "məhsuldarlığını və səmərəliliyini artıracaq", həmçinin dəvələr barədə etibarlı və vahid məlumat bazasının formalaşdırılmasına xidmət edəcək.

Nazirlik artıq sosial şəbəkələrdə gələcək sənədin nümunəsini də yayımlayıb. Hər bir səudiyyəli dəvə krallığın gerbi və üzərində qızılı relyeflə təsvir olunmuş təkhörgüclü dəvə şəkli olan yaşıl pasport alacaq.

Pasport nə üçündür və nəyi dəyişəcək

Telekanalın məlumatına görə, dəvə pasportları satış və kommersiya fəaliyyətinin tənzimlənməsinə, ticarət və daşınmaya nəzarətə, rəsmi sənədləşməyə kömək edəcək. Eyni zamanda bu sənədlər sahiblərin hüquqlarının qorunması və mülkiyyətin təsdiqlənməsi üçün zəmanət rolunu oynayacaq.

Səudiyyə hökumətinin 2024-cü il qiymətləndirməsinə əsasən, krallıqda təxminən 2,2 milyon dəvə mövcuddur. Bu isə o deməkdir ki, dövlət hər bir "dəvə şəxsiyyəti" üçün uyğun sayda sənəd çap etməli olacaq. Pasportlarda nəsil şəcərəsi, yaşı və adı ilə yanaşı daha hansı məlumatların yer alacağı hələlik açıqlanmayıb.

Səhra nəqliyyatından mədəniyyət simvoluna

Dəvələr minilliklər boyu Ərəbistan yarımadasında əsas, bəzən isə yeganə nəqliyyat vasitəsi olub. Bununla yanaşı, onlar sahiblərinə cəmiyyətdə status qazandırıb və gəlirli heyvandarlıq sahəsinin formalaşmasına töhfə verib.

Bu gün Səudiyyə Ərəbistanında və regionda dəvələr sadəcə yük heyvanı deyil, mədəni irsin canlı simvolu sayılır. Onlara ailə üzvü kimi hörmət, qayğı və sevgi ilə yanaşılır. Krallıqda hər il on milyonlarla dollar mükafat fondu olan dəvə festivalları keçirilir. Proqramlara dəvə yarışları, gözəllik müsabiqələri və minlərlə heyvanı və turisti cəlb edən auksionlar daxildir.

Belə festivallarda iştirak edən dəvələrə xüsusi qulluq göstərilir: onlar gündəlik təmizlənir, məşq etdirilir, keyfiyyətli yemlərlə qidalandırılır və hətta psixoemosional vəziyyətlərinə nəzarət olunur. Bu cür elit dəvələrin qiyməti 1,5 milyon dollara çata bilir. Yarışlarda əsasən dişi dəvələr iştirak edir, nəsil artırmaq üçün isə məşqlərdən yayınmamaq məqsədilə surroqat analardan istifadə olunur. Qələbə isə heyvanın dəyərini bir neçə dəfə artırır.

Qalibiyyət hər şeydən bahalıdır

Zəngin dəvə sahibləri qalibiyyət naminə yüz minlərlə dollar xərcləyir. Rəqabətin kəskinləşməsi fonunda bəziləri üstünlük qazanmaq üçün şübhəli üsullara da əl atıb. Son illərdə gözəllik müsabiqələrinin təşkilatçıları kosmetik və plastik müdaxilələrə nəzarəti sərtləşdirib və pozuntulara görə ciddi cəzalar tətbiq edib.

Hakimiyyət dəvələrin aqressiv "tüninqinə", məsələn, dodaqların daha sallanmış, hörgüclərin isə daha qabarlı göstərilməsinə qarşı mübarizə aparır. Bu cür xüsusiyyətlər dar çevrələrdə yüksək qiymətləndirilsə də, təşkilatçılar daha təbii görünüşün təşviq edilməsini əsas prinsip kimi qəbul ediblər.

Minilliklərə gedib çıxan tarix

Dəvələr Ərəbistan yarımadasında həyatın ayrılmaz hissəsi olub. 2021-ci ildə aşkar edilmiş, təbii ölçüdə dəvə və at təsvirləri olan qaya rəsmlərinin yaşı alimlərin fikrincə təxminən 7 min ilə çatır. Bu da dəvələrin region tarixindəki rolunun nə qədər dərin olduğunu göstərir.