İrandakı xalq üsyanları zamanı qətlə yetirilənləri sayı 36-ya çatdı...-"BBC"

Bizi sosial şəbəkələrdən izləyin:

Britaniya media korporasiyası "BBC"-nin 7 yanvarda "HRANA" agentliyinin insan haqları fəallarına istinadla verdiyi məlumata görə, son 10 gündə İranda baş verən kütləvi etirazlarda ən azı 36 nəfər həlak olub.

Moderator.az "NV" kanalının yaydığı xəbərə əsasən bildirir ki, fəalların məlumatına görə, təsdiqlənmiş ölüm hallarından 34-ü etirazçılar, ikisi isə təhlükəsizlik qüvvələri arasında olub.

Bu arada, İran hakimiyyəti 3 təhlükəsizlik işçisinin öldürüldüyünü bildirib.

"HRANA" həmçinin iğtişaşlar zamanı 60-dan çox etirazçının yaralandığını və 2076 nəfərin həbs olunduğunu bildirib. "BBC Fars" jurnalistləri indiyə qədər 20 nəfərin ölümünü və şəxsiyyətini təsdiqləyiblər.

İranda 2025-ci ilin sonlarında başlayan genişmiqyaslı hökumət əleyhinə etirazlar davam edir. Etirazlar Tehranda iqtisadi vəziyyətdən və milli valyutanın ABŞ dollarına nisbətən dəyərdən düşməsindən narazı olan iş adamları arasında başlayıb. 2025-ci ildə İran rialı dollara nisbətən dəyərinin demək olar ki, yarısını itirib və dekabr ayında inflyasiya 42,5%-ə çatıb. Dekabrın 30-da universitet tələbələri etirazlara qoşuldular və nümayişlər digər şəhərlərə də yayıldı. İştirakçılar İranın dini rəhbərliyinə qarşı şüarlar səsləndiriblər.

Beynəlxalq medianın məlumatına görə, bu etirazlar əxlaq polisi tərəfindən hicabı uyğunsuz geyinməkdə ittiham olunan gənc qadın Məhsa Əmininin ölümü ilə başlayan 2022-ci il iğtişaşlarından bəri ən böyük etirazlardır.

"Associated Press"-in məlumatına görə, 1 yanvar 2026-cı il tarixinə qədər İranın dörd fərqli şəhərində ən azı yeddi nəfərin öldüyü məlumdur. Ümumilikdə etirazlar onlarla şəhərə yayılıb.

ABŞ prezidenti Donald Tramp da öz növbəsində İran hakimiyyətinin həmin ölkədəki etirazları yatırmaq cəhdlərinə cavab verib.

"Əgər İran dinc etirazçılara atəş açsa və onları adi qaydada etdiyi kimi vəhşicəsinə qətlə yetirsə, Amerika Birləşmiş Ştatları onların köməyinə gələcək. Biz hərəkətə keçməyə tam hazırıq", - Tramp sosial media hesabı olan "Truth Social"-da yazıb.