"Stresdən qorunmağa kömək edən 5 gündəlik vərdiş" - Araşdırma

Bizi sosial şəbəkələrdən izləyin:

"Sadə gündəlik vərdişlər stres səviyyəsini aşağı salmağa və daxili tarazlığı qorumağa kömək edir..."

Daimi tələskənlik və informasiya yüklənməsi fonunda stres artıq gündəlik həyatın ayrılmaz hissəsinə çevrilib və getdikcə həm fiziki, həm də psixoloji vəziyyətə təsir göstərir.

Moderator.az xəbər verir ki, bu barədə "Real Simple" nəşri yazıb.

Nəşrin yazdığına görə, bir neçə sadə gündəlik vərdiş emosional tarazlığı qorumağa, əhvalı yaxşılaşdırmağa və tükənmişlik riskini azaltmağa kömək edə bilər.

Kortizol nədir və niyə təhlükəlidir?

Kortizol böyrəküstü vəzilərdə istehsal olunan əsas hormonlardan biridir. O, maddələr mübadiləsinin tənzimlənməsində iştirak edir, iltihabı azaldır, yaddaş proseslərinə təsir göstərir və orqanizmin stresə reaksiyasında mühüm rol oynayır.

Gərgin vəziyyət zamanı kortizolun qana ifrazı artır, ürək döyüntüsü sürətlənir və arterial təzyiq yüksəlir. Bu, bədəni sürətli reaksiyaya hazırlayır. Lakin kortizol uzun müddət normadan artıq ifraz olunarsa, orqanizm xroniki stres vəziyyətində qalır və bu, sağlamlıq üçün ciddi risklər yaradır.

Yüksək kortizolun əlamətləri və təsiri

Kortizol səviyyəsini qan, sidik və ya tüpürcək analizi ilə müəyyən etmək mümkündür. Bununla yanaşı, dolayı əlamətlər də mövcuddur.

Ən çox rast gəlinən simptomlar yuxu pozuntuları, daimi yorğunluq, əzələ zəifliyi, diqqət və yaddaş problemləridir. Yüksək kortizol immun sistemini zəiflətdiyi üçün tez-tez soyuqdəymə halları da müşahidə oluna bilər.

Uzunmüddətli stres libidonun azalmasına, qadınlarda menstrual dövrün pozulmasına və psixi sağlamlıq problemlərinə səbəb ola bilər. Xroniki gərginlik depressiya və narahatlıq pozuntuları riskini artırır, bəzən isə zərərli vərdişlərə meyli gücləndirir.

Kortizolu azaltmağa kömək edən gündəlik vərdişlər

Keyfiyyətli yuxu

"PubMed"-in məlumatlarına görə, kifayət qədər və dərin yuxu kortizolun düzgün tənzimlənməsi üçün vacibdir. Yuxu çatışmazlığı streslə mübarizə qabiliyyətini zəiflədir və uzunmüddətli fəsadlara yol aça bilər.

Müntəzəm fiziki aktivlik

Gündə təxminən 30 dəqiqə orta səviyyəli hərəkət - sürətli gəzinti, yoqa və ya evdə yüngül məşqlər stresi azaldır, yuxunu yaxşılaşdırır və xoşbəxtlik hormonlarının ifrazını artırır.

Rahatlama texnikaları

Dərin nəfəs alma, əzələlərin mərhələli boşaldılması, meditasiya və yoqa kortizol səviyyəsini aşağı salmağa kömək edir. Bu üsullar orqanizmi gərginlik rejimindən sakitlik vəziyyətinə keçirir.

Ruh üçün məşğuliyyətlər

Zövq verən hobbilər və yaradıcılıq fəaliyyətləri emosional boşalma yaradır, əhvalı yaxşılaşdırır və stressi azaltmaqda effektiv rol oynayır.

Dəstəkləyici sosial mühit

Yaxın və etibarlı münasibətlər stresə davamlılığı artırır. Əgər müəyyən ünsiyyətlər daimi gərginlik yaradırsa, psixoloji sağlamlıq naminə şəxsi sərhədlər qoymaq vacibdir.

Gündəlik kiçik addımlar böyük təsir göstərir

Streslə mübarizədə uzun saatlar sərf etməyə ehtiyac yoxdur: keyfiyyətli yuxu, qısa fiziki hərəkət, rahatlama texnikaları, sevdiyiniz məşğuliyyətlər və dəstəkləyici sosial əlaqələr gündəlik həyatınızda əhval-ruhiyyəni yaxşılaşdırır və daxili tarazlığı qoruyur.