"Putinlə bağlı həqiqəti qəbul etmədən Ukraynada sülh mümkün deyil" - ABŞ-ın sabiq polkovniki Trampa çağırış edib

Bizi sosial şəbəkələrdən izləyin:

"Moskvanın sülh ritorikası eskalasiya üçün alətə çevrilir..."

ABŞ ordusunun istefada olan polkovniki Robert Maginnis hesab edir ki, Donald Tramp Ukraynada real sülhə nail olmaq istəyirsə, Vladimir Putinlə bağlı Qərbdə hələ də mövcud olan illüziyalardan imtina etməlidir.

Moderator.az xəbər verir ki, bu barədə "nv.ua" nəşri yazıb.

"Putin danışıqlara kütləvi zərbələrlə cavab verir"

Polkovnikin fikrincə, Rusiya lideri müharibənin əvvəlindən bəri kompromislərə eskalasiya, danışıqlara isə kütləvi zərbələrlə cavab verib.

Maginnis "Fox News" üçün yazdığı məqalədə qeyd edir ki, dekabrın 28-də Tramp və Ukrayna prezidenti Zelenski arasında keçirilən görüş səs-küylü bəyanatlarla yadda qalmasa da, əhəmiyyətsiz deyildi.

Onun sözlərinə görə, bu görüşün əsas məqsədi sülh sazişi imzalamaq yox, Trampın Kreml ilə mümkün danışıqlar öncəsi sülh planındakı boşluqları dəqiqləşdirmək idi. Ərazi məsələsi və Zaporojye AES hələ də əsas maneələr olaraq qalır.

"Əsas yanlış fərziyyə Putinin rasional oyunçu olmasıdır"

Maginnis vurğulayır ki, Qərbdə hələ də üstünlük təşkil edən əsas yanlış yanaşma Putinin qismən güzəştlərlə razı salına biləcək rasional lider kimi qəbul edilməsidir. Onun fikrincə, faktlar bunun əksini göstərir: Rusiya sülh təşəbbüslərinin intensivləşdiyi bir vaxtda belə Ukraynaya raket və dron zərbələrini davam etdirir.

Polkovnik hesab edir ki, bu hücumlar təkcə Ukraynaya deyil, həm də Qərbə ünvanlanan siqnallardır. Putin ya müharibəni davam etdirmək niyyətindədir, ya da gələcək danışıqlara daha üstün mövqedən daxil olmaq istəyir. "Nəticə aydındır: Putin ya dayandırılana qədər, ya da bütün tələbləri yerinə yetirilənədək dayanmayacaq", - Maginnis qeyd edir.

Trampın əlində hansı rıçaqlar var

Maginnisə görə, Trampın Ukraynada sülhə yaxınlaşmaq üçün real təsir vasitələri mövcuddur. Bunlara Rusiyaya qarşı sanksiyaların sərtləşdirilməsi, onlardan yan keçmə mexanizmlərinin bağlanması və Ukraynaya hərbi dəstəyin davam etdirilməsi daxildir.

Bu addımlar Rusiyanın hücum imkanlarını zəiflədə və Kremlin hesablamalarını dəyişə bilər. O, həmçinin qeyd edir ki, Moskva üçün hər hansı iqtisadi və ya diplomatik güzəşt yalnız razılaşmalara əməl edildiyi təsdiqləndikdən sonra gündəmə gələ bilər. Məqsəd Putini "inandırmaq" deyil, müharibənin onun üçün qiymətini yüksəltməkdir.