“Ukrayna xalqı inadla kölə olmaqdan imtina edir…”- Ukrayna müsəlmanlarının işğalçılara qarşı savaşan keçmiş lideri

Bizi sosial şəbəkələrdən izləyin:

“Ukrayna milləti sadəcə dünyanın boğazında bir sümüyə çevrilib. Heç kim bizimlə nə edəcəyini bilmir. Hər kəs Putinin şərtləri ilə bağlı Putinlə razılığa gəlməyə məmnun olardı, amma biz...”

Hazırda Ukrayna ordusunun 57-ci moto-atıcı briqadasının leytenantı kimi işğalçı Rusiyaya qarşı cəbhədə savaşan Ukrayna Müsəlmanları Ruhani İdarəsinin ("UMMA") keçmiş müftisi Said İsmayılov “NV” nəşrində Ukrayna xalqının Rusiya təcavüzünə qarşı mübarizəsi barədə çox təsirli bir köşə yazısıyla çıxış edib.

Aktuallığını nəzərə alaraq həmin materialı Moderator.az oxucularının diqqətinə çatdırırıq:

“Ukrayna xalqı inadla ölməkdən imtina edir.

Belə bir təəssürat yaranır ki, deyəsən, artıq bizimlə nə edəcəklərini bilmirlər...

Ruslar bizi öldürməyə çalışır, Amerika Tramp administrasiyası bizi diz çöküb təslim olmağa məcbur etməyə çalışır və öz hakimiyyətimiz bizi birtəhər satmağa çalışır. Ukraynalılar isə səngərlərdə vuruşurlar. Ukraynalılar satılmırlar. Ukraynalılar vəzifəsi və məsuliyyəti olmayan, özlərini sülhməramlı kimi təqdim edən amerikalı iş adamlarına açıq şəkildə gülürlər...

Müxtəlif dövlət hakimiyyət kabinetlərindən gələn tamamilə xaotik açıqlamalar bizə hamımızın satılmış ola biləcəyimizi göstərir, amma satıla bilməyənləri satmaq mümkün deyil. Ukrayna milləti sadəcə dünyanın boğazında bir sümüyə çevrilib. Heç kim bizimlə nə edəcəyini bilmir. Hər kəs Putinin şərtləri ilə bağlı Putinlə razılığa gəlməyə məmnun olardı, amma biz təslim olmaqdan imtina edirik; silahlarımızı və sıralarımızı möhkəm tuturuq...

Qitələr boyunca soyuq havada suallar asılı qalıb: Niyə əllərimizi qaldırmırıq? Niyə silahlarımızı yerə qoymur və müqavimətimizi davam etdiririk? Niyə başımıza kül tökmürük? Niyə öz məzarlarımızı qazmırıq? Niyə sahib olduğumuz hər şeydən imtina etməyə hazır deyilik? Niyə hakimiyyətə pərəstiş etmirik və özümüzə çar istəmirik? Çox narahat bir millətik...

Çox narahat bir millət...

Ciddi deyirəm, bizim yerimizdə olan istənilən xalq artıq sınardı, çünki dünyada heç kim dörd ildir ki, tək bir nüvəsiz ölkəni əzməyə çalışan bir sıra nüvə silahlı ölkələrə qarşı müasir, yüksək texnologiyalı müharibəyə hazır deyil. Hətta isterik Trampı və onun "hava" alverçilərini də gətirdilər...

Qonşularımız - Orban və Fikolar - bizi arxadan vururlar. Təbliğata dəlicəsinə miqdarda pul qoyulur. Ukrayna büdcəsindən də eyni dərəcədə dəlicəsinə miqdarda pul oğurlanır. Lakin ukraynalılar inadla kölə olmaqdan imtina edirlər. Qəti şəkildə... Heç bir bəhanə ilə deyil. Heç bir vədlə deyil. Heç bir təzyiq və ya təhdidlərlə deyil. Əlbəttə ki, hələ də Moskvanın qatillərinin qarşısında diz çökməyə hazır olan kiçik ruslarımız(maloruslar) var, amma artıq onlar ölkədə heç bir söz sahibi deyillər.

Nəhayət, bunu etdiniz. Əsrlər boyu davam edən köləlik, aclıq, kütləvi edamlar, repressiyalar, öz dilimizin və mədəniyyətimizin itirilməsi, deportasiyalar, işgəncələr və təhqirlər bizə yaşamaq uğrunda mübarizə üçün immunitet və yanğı verib. Artıq təhlükəsizlik zəmanətlərinə etibar etmirik, hər şeyin keçəcəyinə inanmırıq, heç kimin bizim üçün ayağa qalxacağına inanmırıq...

Biz yalnız öz əlimizdəki silahlara inanırıq. Silahlı və birləşmiş Ukrayna milləti təhlükəsizliyimizin və yaşamağımızın yeganə qarantıdır, Ukraynanın və ukraynalıların mövcudluğunun yeganə qarantıdır. Bizə silah verin və geri çəkilin, istənilən düşməni özümüz parçalayacağıq...

Pis xəbər və dar fürsət pəncərəsi. Ukraynanın şansı varmı?..

Dünyanın artıq bizə necə yaşamağımızı deməyə haqqı yoxdur. Onların bütün fəlsəfəsi və ideologiyası, bütün prinsipləri və dəyərləri... Onların həqiqətən nəyə dəyər olduğunu gördük. Onlar dəyərsizdirlər. Lider, azadlıq və qanun modeli olmağa çalışan Amerika diktaturalar qarşısında diz çökdü və bütün dəyərlərini hərraca çıxardı. Bu arada, Vitkof və Kuşner Amerika vicdanının və ləyaqətinin satışını rəsmiləşdirməyə tələsirlər. Dünyada artıq nəinki beynəlxalq hüquq, hətta müəyyən edilmiş qaydalar da yoxdur. Bütün dəyərlər "yaxşı sövdələşmələrə" doğru meyllənir. Pul, güc və lovğalıq yeni qlobal dəyərlərə çevrilib.

Buna görə də 21-ci əsrin birinci rübündə artıq bütün dünyaya şərtlərini diktə edən sıx birləşmiş diktatura qrupumuz var və bu ittifaqın getdikcə daha çox üzvü sabit prinsiplərdən imtina edərək yeni qlobal dəyərlərə üstünlük verən keçmiş demokratiya düşərgəmiz var. Bəzi siyasətçilər "Biz sülhə həmişəkindən daha yaxınıq!" deyərkən, mən deyirəm ki, "Biz qlobal texnoloji müharibəyə həmişəkindən daha yaxınıq." Əslində, bu müharibə artıq başlayıb və biz bu müharibədə ən təcrübəli olanıq...

Və sonda:

onlara daha çox qan verməklə heç vaxt bu vampirləri doyurmayacaqsınız. Bu, onların iştahasını və ambisiyalarını artırır. Xilas olmaq üçün bir şans var; illüziyaları kənara atmalı və silahlarımızın nişangahlarından həqiqətə göz dikməliyik..."

Tərcümə və təqdim etdi:

Sultan Laçın