"Belarusda siyasi məhbusların azadlığa buraxılmasında ABŞ-ın xüsusi rolu var" - Kaya Kallas

Bizi sosial şəbəkələrdən izləyin:

"ABŞ-ın məqsədi Belarusun geosiyasi baxımdan Moskvanın orbitindən qismən uzaqlaşdırılmasıdır..."

Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas Belarusda siyasi məhbusların azad olunmasında ABŞ-ın rolunu xüsusi qeyd edib.

Moderator.az xəbər verir ki, bu barədə "dw.com" nəşri yazıb.

Aİ-dən təşəkkür və çağırış

Məlumatda deyilir ki, Kallas dekabrın 13-də "X" sosial şəbəkəsində yazdığı paylaşımda müxalifət liderlərindən Mariya Kolesnikova, Nobel Sülh Mükafatı laureatı Ales Belyatski, hüquqşünas Maksim Znak və daha 120 siyasi məhbusun azadlığa çıxmasını alqışladığını bildirib. "Onların ailə üzvləri və dostlarının sevincini bölüşürəm. Bu işdə əsas pay ABŞ-a məxsusdur. İndi isə ədalətsiz şəkildə həbsdə saxlanılan bütün şəxslər azad olunmalıdır", - Kallas vurğulayıb.

"Biz onların yanındayıq"

Almaniya kansleri Fridrix Mers də xəbəri məmnuniyyətlə qarşıladığını bildirib. Onun sözlərinə görə, Mariya Kolesnikova, Ales Belyatski və digər siyasi məhbusların azad edilməsi gecikmiş, lakin vacib bir addımdır və bu, azadlıq və vətəndaş hüquqları uğrunda mübarizə aparan cəsarətli vətəndaş cəmiyyətinin qələbəsidir. "Biz onların yanındayıq", - kansler qeyd edib.

Almaniya xarici işlər naziri Yohann Vadeyful isə "X"-də paylaşımında Mariya Kolesnikova, Viktor Babariko, Ales Belyatski, Maksim Znak və daha yüzdən çox məhbusun azadlığa buraxılmasından məmnunluğunu ifadə edib və ABŞ hökumətinə göstərdiyi səylərə görə təşəkkür edib. O da Kallas kimi vurğulayıb ki, Almaniya hökumətinin məqsədi hələ də siyasi motivlərlə həbsdə saxlanılanların hamısının azad olunmasıdır.

123 nəfər azadlığa çıxıb

Belarus hakimiyyəti dekabrın 13-də ölkədə siyasi motivlərlə həbs olunmuş 123 nəfərin azad edildiyini açıqlayıb. Bu qərar Belarusun faktiki rəhbəri Aleksandr Lukaşenko ilə ABŞ nümayəndə heyəti arasında iki gün davam edən danışıqlardan sonra verilib.

Azadlığa buraxılanlar arasında jurnalist Marina Zolotova, ədəbiyyatşünas və siyasi analitik Aleksandr Feduta, həmçinin 2020-ci il prezident seçkilərində namizəd olmuş biznesmen Viktor Babariko da var. Azad edilən 114 nəfər Ukraynaya, 9 nəfər isə Litvaya aparılıb.

Sanksiyalar və böyük geosiyasi hesab

ABŞ prezidentinin xüsusi elçisi Con Koul bildirib ki, hazırda Belarus həbsxanalarında qalan təxminən 1000 siyasi məhbus yaxın aylarda azad oluna bilər və bunun iri bir qrup şəklində baş verməsi mümkündür. O, eyni zamanda ABŞ-ın Belarusun kalium sənayesinə tətbiq olunan sanksiyaları ləğv etdiyini açıqlayıb.

"İki ölkə arasında münasibətlər normallaşdıqca, daha çox sanksiya aradan qaldırılacaq", - Koul əlavə edib. Qeyd edək ki, "Belaruskalium" dövlət müəssisəsinə qarşı sanksiyalar 2021-ci ilin avqustunda Belarus iqtisadiyyatına qarşı ilk ciddi məhdudiyyətlərdən biri kimi tətbiq olunub.

"Reuters" agentliyinin yazdığına görə isə, Donald Tramp administrasiyasının Minsk ilə bu razılaşması ABŞ-ın uzunmüddətli strategiyasının bir hissəsidir və məqsəd Belarusun geosiyasi baxımdan qismən Moskvanın orbitindən uzaqlaşdırılmasıdır.