"Avropa Rusiyanın dondurulmuş aktivlərini geri göndərməyi qadağan etdi" - "Deutsche Welle"

"Avropa İttifaqı Rusiya aktivlərini dondurdu, Macarıstan isə Brüsseli "diktatura" adlandırdı..."

Avropa İttifaqı (Aİ) fövqəladə qaydada Rusiya Mərkəzi Bankının dondurulmuş aktivlərinin geri köçürülməsini müvəqqəti qadağan edib.

Moderator.az xəbər verir ki, bu barədə "dw.com" nəşri məlumat yayıb.

Məlumata görə, qadağa,  əsasən, "Aİ iqtisadiyyatına ziyanın qarşısını almaq və Rusiyanın Ukraynaya qarşı təcavüzkar müharibəsini maliyyələşdirməsinin qarşısını almaq" məqsədilə qəbul olunub.

Qadağanın detalları və məqsədi

Qadağa yalnız birbaşa deyil, həm də dolayı köçürmələri, eləcə də hər hansı hüquqi şəxslərin, təşkilatların və ya orqanların Rusiya Mərkəzi Bankı və ya onun göstərişi ilə həyata keçirdiyi əməliyyatlara şamil olunur. Bu, o cümlədən Rusiya Milli Xeyriyyə Fonduna aiddir. Aİ-nin açıqlamasına görə, qadağa aktivlərdən Rusiyanın istifadəsinin qarşısını almaqla, Avropada hibrid təhlükə risklərini də azaltmağı hədəfləyir.

Daha əvvəl isə Aİ ölkələri əksəriyyət səsi ilə Rusiyanın aktivlərinin sabit və uzunmüddətli dondurulmasını təsdiqləyib. Bu qərar, əvvəllər altı ayda bir yenilənməli olan dondurulma prosedurunun əvəzində gəlir və aktivlərin geri qaytarılmasına yalnız Rusiya Ukraynaya müharibə zərərlərinin kompensasiyasını ödəyəcəyi halda icazə veriləcək.

Rusiya və Budapeştin etirazı

Rusiya Mərkəzi Bankı artıq Belçikadakı "Euroclear" bankına qarşı məhkəmə iddiası qaldırıb və Avropa qərarlarını beynəlxalq məhkəmələrdə mübahisələndirəcəyini bildirib. Bank bu qərarın beynəlxalq hüquqa zidd olduğunu, suveren immunitet prinsipini pozduğunu vurğulayır.

Eyni zamanda, Macarıstan baş naziri Viktor Orban qadağan qərarını "Brüsseldə qurulan diktatura" adlandıraraq, Avropa hüququnun pozulduğunu və Aİ rəhbərlərinin qaydaların üstünə çıxdığını iddia edib. O, qərara etirazını bildirib və qanuni vəziyyəti bərpa etmək üçün bütün vasitələrdən istifadə edəcəyini açıqlayıb.

Ukraynaya maliyyə dəstəyi üçün plan

Aİ Komissiyası dondurulmuş 210 milyard avro dəyərində aktivləri istifadə edərək Ukraynaya 2026-2027-ci illərdə hərbi və sivil xərclər üçün kredit verməyi planlaşdırır. Bu kredit Ukraynanın gələcəkdə Rusiyadan alacağı kompensasiyaya əsasən geri qaytarılacaq və faktiki olaraq Rusiya tərəfindən ödənəcək reparasiyaların avanşı rolunu oynayacaq.

Avropa İttifaqı ölkələri arasında son razılaşma növbəti Avropa Şurası toplantısında yekunlaşdırılacaq. Bu zaman kreditin detallarının və digər bağlı məsələlərin təsdiqlənməsi gözlənilir.