"Ukrayna cəbhəsində yeni mərhələ: Rusiya ordusunda itkilər artır, dron müharibəsi kəskinləşir" - "The Telegraph"

"Rusiya həm "birdəfəlik" canlı qüvvəni, həm də daha gücləndirilmiş pilotsuz sistemləri paralel şəkildə tətbiq edir..."

Ukraynada müharibə tədricən klassik döyüş formasından çıxır və həm taktika, həm də texnologiya baxımından yeni mərhələyə keçir.

Moderator.az xəbər verir ki, bu barədə "The Telegraph" nəşri yazıb.

Görünən mənzərə

Nəşr yazır ki, son həftələrdə xüsusilə iki meyl - Rusiyanın piyada qüvvələrində ağır itkilər və eyni zamanda, dronların geniş və daha effektiv tətbiqi önə çıxır. Ukrayna tərəfinin məlumatına görə, son vaxtlar Liman istiqamətində rus hücum birlikləri çox vaxt döyüşə başlıqsız və zirehsiz göndərilir, hətta bəziləri heç bir silah və ya qoruyucu vasitə olmadan cəbhəyə çıxarılır.

Nəşr yazır ki, bu, Rusiya komandanlığının şəxsi heyətə qarşı tam etinasızlığını göstərir. Ukraynalı zabitlər deyir ki, bəzən rus əsgərləri xüsusi olaraq "cəza məqsədilə" ölümə göndərilir, yaralılar belə yenidən döyüşə qaytarılır. Mütəxəssislər bunu iki səbəblə - yüksək itkilər nəticəsində təchizat çatışmazlığı və Rusiya ordusunun bütün texniki resursu daha "dəyərli" bölmələrə yönəltməsi ilə izah edir.

Dronlar müharibənin qaydalarını dəyişir

"The Wall Street Journal" nəşri yazır ki, 2025-ci ildə həlledici dönüş nöqtəsi dron müharibəsində baş verib: əvvəllər üstünlük Ukraynanın tərəfində olsa da, indi Rusiyanın FPV-dronlar və uzaqmənzilli pilotsuz sistemlərdən istifadəsi xeyli güclənib. Xüsusilə "Rubikon" adlı yeni rus bölməsinin fəaliyyəti Ukraynanın logistikasını ciddi zərbə altına alıb.

Ukrayna zabitləri bildirir ki, bəzi cəbhə xəttlərində rus dronları artıq 10:1 nisbətində üstünlük təşkil edir. Ən ağır vəziyyət Pokrovsk ətrafındadır - yol və təchizat marşrutları dron hücumlarına görə o qədər təhlükəlidir ki, Ukrayna hərbçiləri son 16 km məsafəni piyada qət etməli olurlar. Ekspertlər deyir ki, indi Rusiya pilotsuz aparatlarla 40-70 km arxanı vurur, əvvəllər bu, yalnız aviasiyanın işi olub.

Kütləvi hücumlar və yeni növ partlayan dronlar

Ukrayna Hərbi Hava Qüvvələrinin nümayəndəsi Yuri İqnat bildirib ki, son kütləvi zərbələr zamanı Rusiya yeni tip sürətli reaktiv dronlardan istifadə etmiş ola bilər. Onun sözlərinə görə, hücumda ümumilikdə 632 hava hücumu vasitəsi qeydə alınıb, bunlardan 596-sı kamikadze dronlar, 36-sı isə raket olub. Hücum nəticəsində yalnız Kiyev və Xarkov istiqamətində yarım milyon nəfərdən çox insan işıqsız qalıb.

Son xəbərlər göstərir ki, müharibə daha amansız mərhələyə keçib: Rusiya komandanlığı canlı qüvvəni "təkrar istifadə olunan material" kimi görür, Ukrayna isə artan dron hücumları fonunda təchizat və müdafiəni qorumağa çalışır. Hər iki tərəf döyüş taktikalarını yenidən qurur, amma hazırkı dinamika göstərir ki, 2026-cı ildə müharibənin taleyini klassik ordular deyil, pilotsuz sistemlər, elektron mübarizə və informasiya üstünlüyü müəyyən edəcək.