"ABŞ və Ukrayna üçün "çirkli sülh planı": danışıqlar Floridada davam edəcək" - "The Guardian"

"Sülh yalnız Putinin sovet imperiyasını bərpa etmək ideyasından imtina edəcəyi halda mümkündür..."

ABŞ hazırda Ukrayna və Rusiya arasında "nə qalib, nə də məğlub" formatında sülh razılaşmasını müzakirə edir.

Moderator.az xəbər verir ki, bu barədə "The Guardian" nəşri yazıb.

Mümkün kompromis və Qərbin mövqeyi

Analitik Stiven Verthaym hesab edir ki, ideal və ədalətli sülh gözləntiləri real deyil və kompromis,  nə qədər "çirkli" görünsə də, daha uzun və dağıdıcı müharibədən yaxşı alternativ ola bilər. Onun fikrincə, belə razılaşma Ukraynaya ordunu saxlamaq, Qərbdən təhlükəsizlik zəmanəti almaq və Rusiyadan daha hazırlıqlı vəziyyətdə çıxmaq imkanı verə bilər.

Analitik xəbərdarlıq edir ki, ABŞ qeyri-real hədəflərdə israr etsə, Vyetnam, Əfqanıstan və İraq kimi səhvləri təkrarlamaq riski var. O xatırladır ki, Ukrayna artıq Rusiyanın gözləntilərini darmadağın edib və tam hərbi qələbə həm Kiyev, həm Qərb üçün real məqsəd hesab edilmir.

Fransanın mesajı və Avropanın sərt reaksiyası

Fransa xarici işlər naziri Jan-Noel Barro bildirib ki, sülh yalnız bir şərtlə mümkündür: Vladimir Putin sovet imperiyasını bərpa ideyasından imtina etməlidir. Onun sözlərinə görə, Kremlin son aylarda cəbhədə real uğuru yoxdur və Rusiyanın seçimləri azalır.

O, xəbərdar edir ki, Moskva sülh planını qəbul etməsə, Avropa İttifaqı yeni sanksiyalara hazırdır. Barro həmçinin Tramp administrasiyası ilə bağlı yayılan "münaqişəli" sülh sənədinə toxunaraq bildirib ki, avropalı siyasətçilər onu "Putinin arzu siyahısı" adlandırır.

Danışıqlar prosesi genişlənir

Ukrayna nümayəndə heyəti artıq ABŞ-a yola düşüb və Floridada Trampın nümayəndəsi Stiv Uitkoff və Donald Trampın kürəkəni Cared Kuşnerlə görüşəcək. Bu görüşün məqsədi ABŞ və Ukrayna arasında Cenevrədə baş tutmuş ilkin müzakirələrin nəticələrini konkret sənədə çevirməkdir.

"Reuters" agentliyi yazır ki, danışıqlarda ABŞ-ı Dövlət katibi Marko Rubio və Tramp administrasiyasının əsas fiqurları təmsil edəcək. Prezident Zelenski isə bu görüşü "həlledici mərhələ" adlandırıb.

Hazırda Ukrayna həm hərbi, həm siyasi baxımdan ən çətin dövrə daxil olub. Vaşinqtonun təzyiqi artır və masada kompromis təklifləri var - bəzi Qərb paytaxtları bunu yeganə çıxış yolu, digərləri isə Moskvanın maraqlarına güzəşt kimi görür. Hər halda danışıqlar sürətlənir və artıq sual sülhün baş verəcəyi deyil, necə olacağıdır.