"Cəbhədə balans dəyişməzdir: Putinin qələbə bəyanatları reallıqla üst-üstə düşmür" - ISW

"Hər iki tərəf lokal irəliləyiş əldə etsə də, cəbhənin ümumi mənzərəsinə təsir etmir..."

Kremlin nəzarətində olan media və təbliğatçılar ardıcıl şəkildə Ukrayna müdafiəsinin "dağılmasından", "qaçan əsgərlərdən" və "Kiyevə yolun açıldığından" danışsa da, həm müstəqil analitika, həm də bəzi rusiyalı Z-blogerlər bu narrativin uydurma olduğunu təsdiqləyir.

Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) analitikləri yazıb.

Analitiklər Rusiya rəhbərliyinin Ukrayna cəbhəsində "böyük uğurlar" əldə edildiyi barədə açıqlamalarını təkzib edib. ISW vəziyyəti belə təsvir edir: cəb­hə xətti çökmür, döyüşlər mövqe xarakteri daşıyır və Rusiya ordusu təşəbbüsü saxlamasına baxmayaraq, nə sürətli irəliləyiş, nə də qələbə yaxın görünmür.

Analitiklərin məlumatına görə, Rusiya ordusu ağır itkilər verir, Ukrayna yalnız müdafiə olunmur, bəzi sahələrdə əkshücumlar həyata keçirir, Putinin iddia etdiyi "böyük mühasirələr" isə şişirdilmiş və faktlara əsaslanmayan bəyanatlardır.

ISW-nin hesablamalarına görə, Kupyansk və Volçansk istiqamətində səsləndirilən "uğurlar" da real vəziyyətlə üst-üstə düşmür. Analitiklər bildirir ki, Ukrayna qoşunlarının müəyyən mövqelərdən geri çəkilməsi müdafiə xəttinin itirilməsi deyil, strateji manevrdir.

Moskva bunu dolayı şəkildə etiraf edib: Rusiya rəsmiləri artıq bəyan edir ki, Ukrayna ordusu hələ də möhkəm müdafiə saxlayır. Buna baxmayaraq, Putin son çıxışında vurğulayıb ki, "müzakirələr yalnız Kiyev qoşunları işğal olunmuş ərazilərdən çəkildikdən sonra mümkün olacaq", yəni Moskva müharibəni dayandırmaq niyyətində deyil.

Cəbhədə həm rusların, həm də ukraynalıların irəliləyişi

ISW-nin son hesabatı göstərir ki, cəbhədə ümumi sabitlik fonunda lokal irəliləyişlər hər iki tərəfdə qeydə alınır.

Ukrayna ordusu Novopavlovsk istiqamətində, Filia kəndinin şimalında irəliləyib. Bu barədə geolokasiya görüntüləri dərc olunub. Eyni zamanda Ukraynanın "DeepState" analitik platforması bildirir ki, İvanovka kəndi və ətraf ərazilər təmizlənib, 53 Rusiya hərbçisi məhv edilib, 19-u əsir alınıb.

Bununla yanaşı, Rusiya ordusu Kupyansk və Donetsk vilayətində Con­stan­tınovka-Drujkovka xətti boyunca bəzi taktiki irəliləyişlər əldə edib. Həmçinin Petropavlovka istiqamətində mexanikləşdirilmiş hücum vasitəsilə mövqelərin dəyişməsi qeydə alınıb.

Ukrayna hərbçilərinin sözlərinə görə, Pokrovsk istiqamətində vəziyyət çətindir: duman pilotsuz kəşfiyyat vasitələrinin işini məhdudlaşdırır, bu isə Rusiya qoşunlarına əlavə qüvvə yığmağa imkan yaradır. Buna baxmayaraq, Ukrayna rəsmiləri bildirir ki, şəhərin mühasirəsi real təhlükə deyil.

ISW-nin ümumi qiymətləndirməsi belədir: "Cəbhə xətti sabitdir, Rusiya qələbədən uzaqdır, Ukrayna isə hələ də müqavimət göstərmək və lokal üstünlüklər əldə etmək gücündədir". Beləliklə, Kremlin cəbhə ilə bağlı triumfal açıqlamaları hazırkı hərbi vəziyyəti əks etdirmir - müharibə hələ də uzunmüddətli mövqe qarşıdurması mərhələsindədir.