"Bu artıq təkcə hücum deyil, sistemli terror strategiyasıdır" - Zelenski

"Rusiyanın Ukraynaya növbəti hücumu nəticəsində ölənlər və yaralananlar var..."

Rusiyanın 29 noyabrdan etibarən Kiyev vilayətinə ardıcıl dron hücumları nəticəsində Vışqorod şəhərində faciə yaşanıb. 

Moderator.az xəbər verir ki, bu barədə "rbc.ua" nəşri məlumat yayıb.

Gecə hücumu və dağıntılar

Məlumatda deyilir ki, gecə saatlarında "Shahed" tipli dronların zərbəsi ilə çoxmərtəbəli yaşayış binasında böyük yanğın baş verib. İlkin məlumatlara görə, ölən var, xilasetmə işləri isə bir neçə saat davam edib.

Kiyev vilayət administrasiyasının rəhbəri Nikolay Kalaşnikin sözlərinə görə, hazırda məlum olan rəqəmlər belədir: 19 nəfər yaralanıb, onlardan 4-ü uşaqlardır, 11 nəfər isə xəstəxanaya yerləşdirilib. Təəssüf ki, bir nəfərin həyatını xilas etmək mümkün olmayıb.

Kalaşnik bildirib ki, yalnız bir bina deyil, iki çoxmərtəbəli yaşayış binası, 14 fərdi ev, bir müəssisə və ən azı yeddi avtomobil zədələnib. Şəhərdəki "Naberejnıy" bazarı, avtoyuyucu və yol örtüyü də dağıntılar arasındadır. Bu arada 146 sakin təxliyə olunub, psixoloqlar və xilasetmə xidmətləri hadisə yerində işləyir.

Əlaqədar hücumlar və genişmiqyaslı zərbələr

Son hücum tək bir hadisə deyil, artıq bir neçə gecədir ki, Kiyev vilayəti dron atəşinə məruz qalır. Zelenski bildirib ki, yalnız bu gecə Ukrayna şəhərlərinə 122 dron və 2 ballistik raket atılıb. Prezidentin sözlərinə görə, bu həftə ərzində Ukrayna ərazisinə təxminən 1400 kamikadze dron, 1100 idarəolunan aviasiya bombası və 66 raket endirilib.

Zelenski belə hücumların artıq gündəlik hala çevrildiyini qeyd edib və əlavə edib: "Bu gecə Vışqorodda bir insan həyatını itirib, uşaqlar da daxil olmaqla çoxlu xəsarət alan var. Dnepr, Xarkov, Odessa, Sumı və Xerson vilayətlərində də yaralananlar var".

Zelenskidən çağırış

Bundan əvvəlki gecə də hücumlar nəticəsində Kiyev və ətraf bölgələrdə enerji infrastrukturuna ciddi ziyan dəyib, yüz minlərlə insan işıqsız qalıb. Zelenskinin çağırış edib: "Bu artıq təkcə hücum deyil, sistemli terror strategiyasıdır. Müharibəni dayandırmaq üçün qərarlar lazımdır".

Ukrayna prezidenti bildirib ki, təhlükəsizliyin təmin edilməsi üçün yalnız hava hücumundan müdafiə sistemlərinin (HHM) gücləndirilməsi kifayət deyil, həm də beynəlxalq səviyyədə real siyasi addımlar atılmalıdır:

"Raketlər, HHM sistemləri lazımdır. Eyni zamanda tərəfdaşlarla birlikdə müharibəni bitirəcək etibarlı qərarlara ehtiyac var". Bu hücumlar fonunda Ukraynada vəziyyət gərgin olaraq qalır. Xilasetmə işləri davam edir və yaralıların sayının arta biləcəyi bildirilir.