"Putin şagirdləri müharibəyə hazırlayır və məktəbləri hərbi düşərgəyə çevirir" - "The Wall Street Journal"

"Sinif otağı, yoxsa hərbi poliqon?..."

Kreml uşaqlardan gələcək əsgərlər formalaşdırır

"The Wall Street Journal" nəşrinin yazdığına görə, Rusiyada məktəb sistemi sürətlə militarizasiya olunur: hərbçilər siniflərə girir, uşaqlara silah, intizam və döyüş hazırlığı öyrədir.

Bu ilin payızında Kursk vilayətində 6-8 yaşlı birinci sinif şagirdləri sıraya düzülərək, Ukrayna cəbhəsindən qayıtmış əsgərin qarşısında forma qaydasını "düzəldirdilər". Ardınca həmin uşaqlar heç nə olmamış kimi rus dili dərsinə keçib. Dövlət TV-si bu səhnələri bütün ölkəyə nümayiş etdirir - məqsəd aydındır: gələcək müharibələr üçün potensial döyüşçüləri məhz məktəbdə formalaşdırmaq.

Təhsil sistemi ideoloji və hərbi nəzarətə keçir

2014-cü ildə Krımın ilhaqından sonra başlayan bu proses 2022-ci ildəki genişmiqyaslı işğaldan sonra daha da güclənib. İndi Rusiyada silahla davranış orta məktəbdə məcburi dərsdir. Şagirdlər dron idarə edir, "Kalaşnikov"u söküb-yığır, sıravi orden və komanda qaydalarını öyrənir. Tarix dərslikləri Qərbi "düşmən", Ukraynanı isə "Qərbin aləti" kimi təqdim edir.

Bundan əlavə, Müdafiə Nazirliyinə tabe olan "Yunarmiya" adlı hərbi təşkilat artıq 1,85 milyon uşaq və yeniyetməni əhatə edir. Məktəblərdə həftə "Vacib söhbətlər" adlı ideoloji saatla başlayır - orada uşaqlara "Vətən üçün yaşamalı və xidmət etməlisən" deyilir. 2024-cü ildən dərsliklərə AK, RPK, RPG, Snayper tüfəngi və hətta psixoloji əməliyyatlar barədə fənlər də əlavə olunub. Putinin fikri açıqdır: "Müharibələri generallar yox, müəllimlər qazanır".

Cəmiyyət parçalanır: tərəfdarlar və etiraz edənlər

Kreml müharibənin illərlə davam edə biləcəyini gizlətmir və analitiklər hesab edir ki, məqsəd "tənqidsiz, loyal və döyüşə hazır nəsil" yaratmaqdır. Bu proses yalnız Rusiyanın daxilində deyil, işğal olunan Ukrayna ərazilərində də tətbiq olunur - orada Ukrayna dili və tarixi dərslərdən tam çıxarılıb.

Buna baxmayaraq, narahatlıq böyüyür. Təhsil ekspertləri xəbərdarlıq edir: "Uşağa silah verib "ukraynalılar düşməndir" deyəndə onun artıq alternativi yoxdur - o, kritik düşünməyi bacarmır". Bu sistemə qarşı çıxan müəllimlər cəzalandırılır. Moskvalı müəllim Natalya Taranuşenko şagirdlərinə Rusiya ordusunun cinayətlərindən danışdığına görə 7 il həbs cəzası alıb və ölkəni tərk etmək məcburiyyətində qalıb. 

Rusiyada təhsil artıq sadəcə təhsil deyil - o, dövlətin ideoloji və hərbi alətinə çevrilib. Uşaqlara verilən mesaj sadədir: düşünmə, soruşma, inan və döyüş. Bu sistemin yetişdirdiyi nəsil isə gələcəkdə Rusiyanın ən qorxulu siyasi alətinə çevrilə bilər.