"Rusiyanın Pokrovsk və Mirnoqrad istiqamətində prioritetləri dəyişir" - ISW 

"Moskva şəhərin ələ keçirilməsinə fokuslanır, tam mühasirə hələ ikinci plandadır..."

Pokrovsk uğrunda döyüş Rusiyanın əsas hədəfinə çevrilib

Amerikanın Müharibənin Öyrənilməsi İnstitutu (ISW) analitiklərinin məlumatına görə, Rusiya ordusu Pokrovsk və Mirnoqrad bölgəsində taktiki yanaşmanı dəyişib və Ukraynanın geniş mövqelərini mühasirəyə almaq əvəzinə, hazırda əsas diqqətini bilavasitə Pokrovsk şəhərinin ələ keçirilməsinə yönəldir.

ISW yazır ki, son günlər Rusiya qüvvələrinin şəhər daxilində və yaxınlığında irəliləməsi Kremlin prioritetinin dəyişdiyini göstərir. Analitiklərin fikrincə, Rusiya hazırda geniş dairə şəklində mühasirə planını fəal şəkildə davam etdirmir və cənubdan əlavə hücumlar da müşahidə olunmur.

Rusiyanın strategiyası və onun səbəbləri

Araşdırmada bildirilir ki, Moskva Pokrovskun ələ keçirilməsini bir neçə məqsədlə prioritet seçə bilər:

- İnformasiya effekti: şəhərin işğalı Kreml üçün siyasi və təbliğat baxımından uğur kimi təqdim edilə bilər.

- Strateji mərhələlilik: Pokrovskun ələ keçirilməsi gələcəkdə geniş mühasirə əməliyyatlarını asanlaşdıra bilər.

Bununla belə, ISW qeyd edir ki, Ukraynanın şimal cinahında həyata keçirdiyi əks-hücumlar Rusiya ordusunun templərini azaldıb və mühasirə planlarının reallaşmasını çətinləşdirib. Eyni zamanda, 51-ci Rusiya ordusunun şimal-şərqdən irəliləməsi də gözləniləndən daha zəif tempdə gedir. ISW vurğulayır ki, Rusiya  komandanlığı hazırda klassik mühasirə taktikalarını tətbiq etmir, lakin strategiyanı istənilən anda dəyişə bilər.

Ukrayna mövqeyi və siyasi fon

Ukraynalı hərbi ekspert Denis Popoviç bildirir ki, Ukrayna Silahlı Qüvvələrinin Pokrovsku müdafiə etmək üçün həm siyasi, həm də hərbi səbəbləri var.

- Siyasi aspekt: şəhərin itirilməsi Putinə Qərbə "Rusiya irəliləyir" mesajı vermək üçün əlavə təbliğat imkanı yaradacaq.

- Hərbi səbəblər: şəhər hətta dağıdılmış halda belə, qış mövsümündə ən yaxşı müdafiə mövqeyi sayılır.

Pokrovskun işğalı Rusiya ordusunu Dnepropetrovsk vilayətinin inzibati sərhədinə yaxınlaşdıracaq və Moskvanın Donetsk vilayətində daha geniş hücum üçün əlavə qüvvələr toplamasına imkan verəcək. Prezident Vladimir Zelenski isə vəziyyəti "çox çətin" adlandırıb və bildirib ki, qoşunların mümkün geri çəkilməsi barədə qərar yalnız bölgədəki hərbi komandanlıq tərəfindən verilə bilər.