"ABŞ Avropanı Rusiya qazından tamamilə təmizləmək niyyətindədir" - "Financial Times"

Bizi sosial şəbəkələrdən izləyin:

"Vaşinqton müttəfiqlərdən Moskvanın enerji resurslarından imtina etməyi tələb edir..."

ABŞ Avropa enerji bazarını yenidən formalaşdırır

"Financial Times" nəşri yazır ki, ABŞ rəsmiləri Avropanın enerji xəritəsini dəyişmək üçün fəal diplomatik təzyiq göstərir. Məqsəd - Rusiyanın Avropa bazarındakı qazını "son molekuluna qədər" sıxışdırıb çıxarmaq və onun yerini Amerika enerji resursları ilə doldurmaqdır.

Moderator.az xəbər verir ki, məqaləyə görə, ABŞ nümayəndə heyətləri Avropa ölkələri ilə keçirilən demək olar ki, bütün danışıqlarda Rusiya və İranın enerji təchizatının dayandırılması məsələsini gündəliyə salır. Diplomatik xətt açıq və sərtdir: Moskvanın qazı və nefti Avropadan tamamilə çıxmalıdır.

ABŞ şirkətləri aktivləşir: "Gunvor", "Lukoyl" və siyasi maneələr

Nəşr yazır ki, Vaşinqtonun bu kampaniyası "Lukoyl"un xarici aktivlərinin satışı çərçivəsində yeni dinamika yaradıb. ABŞ-ın sanksiyaya məruz qoyduğu rus enerji nəhənginin Avropadakı aktivlərini almaq istəyənlər arasında ən çox müzakirə edilən ad "Gunvor" şirkətidir. Lakin ABŞ Maliyyə Nazirliyi xəbərdarlıq edib: müharibə bitmədən şirkətə lisenziya verilməyəcək.

"Gunvor"un keçmiş sahibləri də diqqət mərkəzindədir. 2014-cü ilə qədər şirkətin 43,5 faizi rusiyalı oliqarx Gennadiy Timçenkoya məxsus olub. O, ABŞ sanksiyaları tətbiq olunmazdan bir gün əvvəl payını sataraq şirkətdən çıxıb. Buna baxmayaraq, Vaşinqton illərlə şirkətin Kremlin maraqları ilə əlaqəli ola biləcəyindən ehtiyat edib. Sanksiya siyasətinin keçmiş kuratoru Daniel Frid bunu belə ifadə edib:

"Gunvor" Putin dövründə Rusiyanı tanıyan hər kəs üçün tanış ad olub".

Yeni alıcılar oyunda: Asiya və Avropa gözləyir

ABŞ-ın sərt mövqeyi fonunda "Lukoyl"un xarici aktivləri üçün artıq yeni potensial alıcılar formalaşır. "Reuters"-in məlumatına görə, aktivlərə maraq göstərənlər arasında Asiyanın və Avropanın böyük enerji şirkətləri var.

Xüsusilə, Qazaxıstanın "KazMunayGaz" dövlət şirkəti "Lukoyl"un ölkə daxilindəki paylarını almağı nəzərdən keçirir. Söhbət dünyanın ən iri qaz və kondensat yataqlarından biri olan Karaçaqanak layihəsindəki paydan gedir. Layihənin digər ortaqları - "Eni", "Shell", "Chevron" və elə həmin "KazMunayGaz"-dır.

ABŞ-ın strategiyası artıq təkcə enerji siyasəti deyil, geosiyasi güc alətidir. Vaşinqton Moskvanın enerji təsirini Avropadan tam çıxarmağa çalışır, Rusiya isə sanksiyaların fonunda məcburən öz aktivlərini satışa çıxarır. Bunun necə bitəcəyi isə yalnız enerji bazarını deyil, müharibənin siyasi gələcəyini də müəyyən edəcək.