"Saç tökülməsinə qarşı inqilabi kəşf: Tayvan alimləri yeni təbii serum hazırlayıb" - Yeni təqdiqat

"Tayvanlı tədqiqatçılar təbii yağ turşularına əsaslanan yeni serumla saçların yenidən çıxmasını təmin edib..."

Tayvan Milli Universitetinin alimləri illərlə davam edən müşahidələrdən sonra saç tökülməsinə qarşı sadə və təhlükəsiz üsul tapıblar.

Moderator.az xəbər verir ki, bu barədə "science.mail.ru" nəşri məlumat yayıb.

Sadə müşahidədən elmi kəşfə

Alimlər bu kəşfi "tükənməyən regenerasiya qabiliyyətinin sübutu" adlandırır. Onların fikrincə, dəri səthinin yüngül zədələnməsi və ya qıcıqlanması bədəndə "hipertrixoz", yəni həddindən artıq tüklənmə prosesini hərəkətə gətirə bilər.

Bu ideyanı yoxlamaq üçün professor Sunq-Jan Linin rəhbərlik etdiyi komanda üzərindəki tükləri qırxılmış siçanlarda süni yolla yüngül ekzema yaradıb. Onların dərisinə sodyum dodesil-sulfat adlı qıcıqlandırıcı maddə çəkilib. Nəticə təəccüblü olub: cəmi 10-11 gün ərzində müalicə olunan hissələrdə yeni tük kökləri əmələ gəlib, digər siçanlarda isə bu proses baş verməyib.

Tədqiqatçılar aşkar ediblər ki, qıcıqlanma immun hüceyrələrinin dərialtı piy qatına hərəkətini stimullaşdırır. Orada yağ hüceyrələri aktivləşir və saç follikullarının bərpasını başladan bioloji siqnallar göndərir. Bu mexanizm sonradan insan dərisindəki saç kökləri üçün də tətbiq oluna bilər.

Təbii yağların gücü

Elm adamları daha sonra kimyəvi maddələrdən imtina edərək, eyni effekti təbii yolla əldə etməyə çalışıblar. Bunun üçün onlar oleyin (omega-9) və palmitolein (omega-7) yağ turşularını spirt məhlulunda həll edərək yeni bir serum hazırlayıblar.

Bu qarışığın ən böyük üstünlüyü dərini zədələmədən eyni saçartırıcı effekti göstərməsidir. Siçanlar üzərində aparılan təcrübələrdə serumun cəmi 20 gün ərzində tüklərin tam bərpasına səbəb olduğu müşahidə olunub.

Professor Lin bildirib ki, bu yağ turşuları insan orqanizmində və bir çox bitki yağlarında təbii şəkildə mövcuddur, buna görə də istifadəsi təhlükəsizdir. O, hətta preparatın ilkin versiyasını şəxsən öz ayaqlarında sınaqdan keçirib və üç həftə sonra saç çıxışını müşahidə etdiyini deyib.

Yeni dövrün başlanğıcı

Alimlər artıq bu serumun patentini alıb və yaxın aylarda insanlar üzərində klinik sınaqlara başlamayı planlaşdırır. Məqsəd - optimal dozanı müəyyən etmək və dərman preparatına çevrilmədən, sərbəst şəkildə satışa çıxara bilməkdir.

Elm ictimaiyyəti bu kəşfi saç tökülməsinin müalicəsində inqilabi dönüş adlandırır. Məhz təbii mənşəli yağ turşularına əsaslanan bu serum, minlərlə insanın saç tökülməsi probleminə kimyəvi və hormonal dərmanlardan fərqli, yan təsirsiz bir alternativ təqdim edə bilər.

"İnsanlar təkamül prosesində bədən tüklərinin çoxunu itirsələr də, regenerasiya qabiliyyətini qoruyub saxlayıblar", - professor Lin qeyd edir. -  "Biz sadəcə bu qədim mexanizmi yenidən oyatmağı öyrəndik".