"Mahmud Abbas öz varisini dəyişdi: İsrailə yaxın siyasətçi Huseyn əl-Şeyx Fələstin rəhbərliyinə gətirildi" - İsrail mətbuatı

"Fələstin liderinin yeni qərarı bölgədə siyasi balansı dəyişə bilər - onun seçdiyi varis İsraillə sıx əlaqələri və Qərb yönümlü baxışları ilə tanınır..."

Fələstin Muxtariyyətinin (FM) rəhbəri Mahmud Abbas bazar günü rəsmi qərarla öz varisini dəyişdiyini elan edib.

Moderator.az xəbər verir ki, bu barədə "israrlinfo.co" nəşri məlumat yayıb.

Yeni varis elan olundu

Yeni "konstitusion bəyannaməyə" əsasən, prezidentlik postu boşaldığı halda səlahiyyətlər artıq Milli Məclisin sədri Rəvi Fəttuha deyil, Fələstin Azadlıq Təşkilatının (FAT) icraiyyə komitəsinin vitse-prezidenti Huseyn əl-Şeyxə keçəcək. Bu sənəd FM-in "Wafa"' rəsmi saytı vasitəsilə dərc olunub və ötənilki bəyannaməni ləğv edir. Həmin sənəddə Abbas varisi kimi Fəttuhu göstərib.

2025-ci ilin aprelində vitse-prezident vəzifəsi yaradıldıqda 65 yaşlı diplomat Huseyn əl-Şeyx bu posta təyin edilib. O zaman rəsmi mənbələr bu addımı "varislik deyil, yardımçı funksiyası" kimi təqdim edib. Lakin indi Abbasın qərarı bu şübhələri aradan qaldırıb - əl-Şeyx rəsmi olaraq prezidentin müvəqqəti varisi statusu alıb.

İsrailə yaxın siyasətçi və köhnə təhlükəsizlik zabiti

Oslodan sonra imzalanan sülh razılaşmalarından sonra Huseyn əl-Şeyx Fələstin təhlükəsizlik qüvvələrində polkovnik rütbəsi alıb və İsraillə əlaqələrə cavabdeh şəxs kimi təyin olunub. 2007-ci ildən etibarən o, İsrail ordusu ilə əlaqələrin əsas koordinatoru kimi fəaliyyət göstərib.

İllər keçdikcə əl-Şeyx Abbasın ən etibarlı müşavirlərindən birinə çevrilib. O, həmçinin İsraillə bütün əməkdaşlıq kanallarını nəzarətdə saxlayıb - iş icazələri, ticarət və tibbi səfərlər daxil olmaqla, İsrailə giriş üçün bütün müraciətlər onun vasitəsilə keçib. Bu, əl-Şeyxə həm güclü təsir mexanizmi, həm də böyük korrupsiya mənbəyi qazandırıb.

İvrit dilini sərbəst bilən siyasətçi özünü "pragmatik" adlandırır və yaxın gələcəkdə müstəqil Fələstin dövlətinin yaranmasına inanmır. O, "mövcud şəraitdə işləmək" prinsipini dəstəkləyir və Qərb mediasında ən "mülayim və rasional fələstinli siyasətçi" kimi təqdim olunur. Lakin Fələstin cəmiyyətində ona münasibət tam fərqlidir - çoxları onu xalqın çətin durumundan şəxsi qazanc üçün istifadə edən korrupsioner hesab edir.

Tramp planının kölgəsində yenidənqurma

Fələstin rəhbərliyindəki bu dəyişikliklər Vaşinqtonun təşəbbüsü ilə aparılan yeni "muxtariyyət islahatı" müzakirələri fonunda baş verir. Bu islahatlar Donald Trampın "Orta Şərq sülh planı"nın tərkib hissəsi hesab olunur.

Analitiklər hesab edir ki, Abbasın Huseyn əl-Şeyxi varis kimi seçməsi Qərblə münasibətləri sabit saxlamaq, eyni zamanda İsraillə toqquşmanı minimuma endirmək məqsədi daşıyır. Lakin bu qərar həm də daxildə böyük narazılıq yarada bilər, çünki bir çox fələstinlilər üçün əl-Şeyx "mübarizə simvolu" deyil, İsraillə əməkdaşlıq edən bürokrat obrazıdır.

İndi Fələstin siyasətinin qarşısında iki yol dayanır: ya Abbasın "pragmatik" varisi vasitəsilə status-kvonu qorumaq, ya da xalqın radikal tələblərinə cavab vermək. Huseyn əl-Şeyxin gələcəkdə hansı istiqaməti seçəcəyi isə Yaxın Şərqdə qüvvələr balansını bir daha dəyişə bilər.