"Şimali Koreya yeni ballistik raketi nümayiş etdirib" - "Daily Mail"

"Pxenyanın hərbi və strateji mesajı..."

Şimali Koreyanın paytaxtı Pxenyanda oktyabrın 8-də keçirilən hərbi paradda ölkənin ən güclü "Hvasan-20" qitələrarası ballistik raketi nümayiş etdirilib.

Moderator.az xəbər verir ki, bu barədə "Daily Mail" nəşri məlumat yayıb.

Nəşr qetd edir ki, tədbir Koreya Əmək Partiyasının yaranmasının 80 illiyinə həsr olunub və ölkənin silahlı qüvvələrinin texnoloji üstünlüyünü, həmçinin beynəlxalq arenadakı mövqeyini göstərmək məqsədi daşıyıb.

Paradda KXDR lideri Kim Çen Inin yanında Rusiya, Çin və Vyetnamın yüksək səviyyəli nümayəndələri - Rusiyanın Təhlükəsizlik Şurasının sədr müavini Dmitri Medvedev, Çin Dövlət Şurasının baş naziri Li Çyan və Vyetnam Kommunist Partiyasının baş katibi To Lam iştirak edib. Rəsmi fotosənədlərdə onların hamısı Kim Çen Inin yaxınlığında oturub, bu isə ölkələr arasında hərbi və siyasi əməkdaşlığın rəmzi təsdiqi kimi qiymətləndirilir.

"Hvasan-20": hərbi güc və strateji mesaj

"Hvasan-20" şimali koreyalıların arsenalındakı ən güclü raket sayılır və onun uçuş məsafəsi təxminən 15 min kilometrdir, bu da ABŞ-ın istənilən nöqtəsinə zərbə endirməyə imkan verir. Ekspertlər raketin çoxbaşlı başlıq daşıya bildiyini və saxta hədəflərlə də təchiz oluna biləcəyini qeyd edir. Solid yanacaqla işləməsi isə ona sürətli işə salınma və gizlilik təmin edir.

Paradda yalnız raketlər deyil, həm də "Çxonma-20" tankları, özüyeriyən haubitsalar, 600 mm-lik reaktiv artilleriya sistemləri, uzaqmənzilli qanadlı raketlər, pilotsuz uçuş aparatları və zenit-raket kompleksləri nümayiş etdirilib. Məkan boyunca KXDR-in qvardiya hissələri, xüsusi təyinatlı bölmələr və strateji qoşunlar keçid edib.

Regional və qlobal kontekst

Kim Çen In çıxışında ordunun partiyanın məqsədlərini gücləndirmək və gələcəkdə çətinlikləri aşmaq üçün vacib olduğunu vurğulayıb. O, həmçinin Şimali Koreya əsgərlərinin Ukrayna münaqişəsində Rusiyanın yanında iştirakını qeyd edərək "qəhrəman döyüş ruhu və xaricdəki qələbələr"in ordunun ideoloji və mənəvi bütövlüyünü nümayiş etdirdiyini bildirib.

Pxenyandakı parad regionda strateji balansın dəyişdiyi bir dövrdə baş tutub. Ekspertlər bunu Şimali Koreyanın nüvə statusunun və hərbi potensialının geri dönməzliyinə işarə kimi qiymətləndirir. Harvard Universitetinin Asiya Mərkəzinin elmi əməkdaşı Son Hyun Li qeyd edib ki, bu parad yalnız təntənəli nümayiş deyil, həm də regional geosiyasi dəyişikliklərin kulminasiya nöqtəsidir.

Paradda Medvedev və digər xarici nümayəndələrin iştirakı KXDR ilə Rusiya, Çin və Vyetnam arasında möhkəm üçtərəfli blokun formalaşdığını göstərir. Pxenyanın mesajı açıqdır: Şimali Koreya yalnız daxili siyasi mövqeyini gücləndirmir, həm də qlobal oyunçulara strateji xəbərdarlıq edir və ABŞ-ın regiondakı yaxın müttəfiqlərinə siqnal verir.