"Ukraynanın "Tomahawk" istəyi və "Patriot" böhranı - "The Telegraph"

"Ukrayna uzaqmənzilli raketlərə ümid edir, amma Rusiyanın hücumları hava müdafiəsini zəiflədir..."

BMT Baş Assambleyası çərçivəsində Nyu-Yorkda keçirilən görüşdə Ukrayna prezidenti Vladimir Zelenski ABŞ prezidenti Donald Trampdan "Tomahawk" qanadlı raketlərinin verilməsini xahiş edib. 

Moderator.az xəbər verir ki, bu barədə "The Telegraph" nəşri yazıb.

Zelenskinin Tomahawk istəyi

Nəşr yazır ki, bu silah müharibənin gedişatını dəyişə biləcək gücə sahibdir. ABŞ administrasiyası məsələni artıq rəsmi müzakirəyə çıxarıb. Vitse-prezident Cey Di Vens də təsdiqləyib ki, Kiyevin bu istəyi nəzərdən keçirilir. Əgər Tramp razılıq versə, NATO çərçivəsində Avropa hökumətləri maliyyələşdirməni öz üzərinə götürə bilər.

Vaşinqtonun Ukrayna üzrə xüsusi elçisi Kit Kelloq isə daha irəli gedərək bildirib: "Kiyev dərin zərbələr endirmək imkanını istifadə etməlidir. Heç bir ərazi toxunulmaz deyil".

"Tomahawk"ın texniki imkanları

"Tomahawk" gəmilərdən, sualtı qayıqlardan, təyyarələrdən və ya quru platformalardan buraxıla bilən subsonik qanadlı raketdir. Modeldən asılı olaraq 2 500 km-ə qədər məsafəni qət edir, radarları dolaşaraq uçur və 450 kq-lıq döyüş başlığı daşıyır. Bu, komanda məntəqələri, sursat anbarları və hərbi istehsal müəssisələri kimi hədəfləri məhv etməyə imkan verir.

Lakin analitiklər xəbərdarlıq edir: təkcə "Tomahawk" təchizatı strateji balansı dəyişməyə bilər. "Chatham House" eksperti Kir Cayls qeyd edir ki, Putinin hesablamalarını dəyişə biləcək yeganə amil Rusiyanın daxildə siyasi sabitliyini sarsıdacaq dərəcədə dağıdıcı zərbələrdir.

"Patriot"ların zəifləyən gücü

Digər tərəfdən, "Financial Times" xəbər verir ki, Rusiya son aylarda öz raketlərini modernləşdirərək Ukraynanın "Patriot" sistemlərini daha çox çaşdırmağa başlayıb. Xüsusilə "İsgəndər-M" və "Kinjal" tipli raketlər trayektoriyalarını dəyişərək kəskin bucaqlarla dalış edir və beləliklə, ABŞ istehsalı "Patriot"ların ələ keçirmə imkanlarını azaldır.

Məsələn, iyulun 9-da Rusiyanın atdığı 13 ballistik raketdən yalnız 7-si vurula bilib. Avqustda Ukraynanın raketlərin ələ keçirmə səviyyəsi 37 faizə yüksəlsə də, sentyabrda cəmi 6 faizə düşüb. Nəticədə, Kiyev və ətrafında ən azı dörd pilotsuz aparat zavodu ciddi ziyan görüb, hətta Avropa İttifaqı nümayəndəliyinin ofisi də raket zərbələrindən zədələnib.

İki meylin toqquşması

Beləliklə, Ukraynanın hava hücumundan müdafiə sistemləri zəiflədikcə, uzaqmənzilli hücum qabiliyyətlərinin artırılması daha da həyati xarakter alır. Zelenskinin "Tomahawk" istəyi yalnız taktiki üstünlük deyil, həm də strateji tarazlığı qorumaq üçün çıxış yolu kimi görünür.

Lakin burada iki böyük maneə qalır: ABŞ-ın məhdud istehsal imkanları və Tramp administrasiyasının siyasi iradəsi. Əgər Qərb zamanında reaksiya verməsə, Moskvanın raket manevrləri qarşısında "Patriot"ların acizliyi Ukraynanın müdafiəsini daha da çətinləşdirəcək.