"Avropa İttifaqı Rusiyaya qarşı sanksiyaları sərtləşdirir" - fon der Lyayen

Bizi sosial şəbəkələrdən izləyin:

"Brüssel Rusiyanın dondurulmuş aktivləri ilə bağlı razılığa gələ bilməyib..."

Kopenhagendə keçirilən qeyri-rəsmi sammitdən sonra Avropa Komissiyasının rəhbəri Ursula fon der Lyayen bəyan edib ki, Avropa İttifaqı Rusiyaya qarşı sanksiya siyasətində mərhələli addımlardan imtina edir və daha sərt tədbirlərə keçir.

Moderator.az xəbər verir ki, bu barədə "The Guardian" nəşri yazıb

Sanksiyaların yeni mərhələsi

Fon der Lyayen vurğulayıb ki, bu paket ABŞ-la koordinasiya olunmuş şəkildə hazırlanıb və yaxın vaxtlarda qəbul olunacaq. Məlumatda deyilir ki, hazırlanan 19-cu paket enerji, maliyyə və ticarət sahələrini əhatə edir.

Bu sırada Rusiya neftinin qiymət tavanının 47,6 dollara endirilməsi, "Mir" ödəniş sisteminə məhdudiyyətlər, bir sıra filizlərin, metalların, kimyəvi maddələrin ixracına qadağa, 45 şirkətə qarşı sanksiyalar, o cümlədən hərbi sektorla əməkdaşlıq edən xarici müəssisələr, 2027-ci ilə qədər Rusiyadan maye qazın

idxalından tamamilə imtina, üçüncü ölkələrə qarşı Moskvanın məhdudiyyətlərdən yan keçməsinə kömək edən "ikinci dərəcəli sanksiyalar" nəzərdə tutulur.

Dondurulmuş aktivlər ətrafında qalmaqal

Eyni sammitdə digər mübahisəli mövzu - Ukraynaya Rusiyanın dondurulmuş aktivləri hesabına "reparasiya krediti" verilməsi məsələsi gündəmə gəlib. Söhbət 140 milyard avrodan gedir. Lakin təşəbbüs ciddi müqavimətə rast gəlib. Belçika əsas maneə yaradan ölkədir, çünki Rusiya vəsaitlərinin böyük hissəsi "Euroclear" maliyyə qurumunda saxlanılır və bu, ölkə büdcəsinə böyük vergi gəliri gətirir. Brüssel hüquqi risklərin bölüşdürülməsini tələb edir.

Fransa və Lüksemburq beynəlxalq hüququn pozulacağından ehtiyat edərək razılıq verməyib. Lüksemburq baş naziri açıq şəkildə deyib: "Başqasına aid olanı sadəcə götürmək olmaz". Makron bu mövzuda açıq şəkildə Belçikanın baş naziri Bart De Veverin mövqeyini dəstəkləyib və beynəlxalq hüququn mütləq gözlənilməli olduğunu vurğulayıb. Beləliklə, yaxın üç həftə ərzində Brüsseldə keçiriləcək növbəti görüşədək Avropa Komissiyasının rəsmi hüquqi təklif irəli sürməsi real görünmür.

Qərbin dilemmaları

Qərb ölkələri Ukraynanı maliyyələşdirmək üçün yeni mexanizm axtarır. G7 maliyyə nazirləri öz yurisdiksiyalarında Rusiyanın dondurulmuş

dövlət aktivlərindən koordinasiyalı şəkildə istifadə etməyə hazır olduqlarını bəyan etsələr də, Avropa İttifaqı daxilində hələlik yekdil mövqe yoxdur. Eyni zamanda, Moskva xəbərdarlıq edir ki, əgər "Euroclear"-dakı vəsaitlər Kiyevin xeyrinə yönləndirilərsə, Rusiyada fəaliyyət göstərən Avropa şirkətlərinin əmlakı müsadirə oluna bilər.

Beləliklə, Avropa İttifaqı bir tərəfdən Rusiyaya qarşı sanksiyaları daha da sərtləşdirir, digər tərəfdən isə Ukraynanı dəstəkləmək üçün Rusiya aktivlərindən istifadə məsələsində parçalanmış vəziyyətdədir. Fon der Lyayen "təzyiqin artırılmasını" vəd etsə də, Makron və De Vever kimi liderlərin ehtiyatlı mövqeyi göstərir ki, Brüsseldə hüquqi və siyasi balans tapmaq asan olmayacaq. İttifaq qarşıdakı həftələrdə həm Rusiyaya qarşı sərtliyini nümayiş etdirmək, həm də beynəlxalq hüququn prinsiplərini tapdalamamaq arasında çətin seçim etməli olacaq.