"Avropada təhlükəli gərginlik: ABŞ silah satışını məhdudlaşdırır,Rusiya təxribatları artır" - "The Atlantic"

Bizi sosial şəbəkələrdən izləyin:

"NATO sərt cavab axtarır, Avropa isə həm hava məkanında, həm də hava limanlarında təzyiq altındadır..."

Pentaqon Avropaya bir sıra silah satışlarını, o cümlədən "Patriot" sistemlərinin ixracını dayandırıb.

Moderator.az xəbər verir ki, bu barədə "The Atlantic" nəşri yazıb.

ABŞ silah satışını məhdudlaşdırır - Avropa boşluqda qalır

Nəşrin yazdığına görə, ABŞ Müdafiə Nazirliyi hesab edir ki, bu sistemlərin sayı azdır və onlar yalnız öz ehtiyatları üçün saxlanmalıdır. Halbuki Avropa məhz Rusiya təhdidləri fonunda bu texnologiyaya daha çox ehtiyac duyur.

Ekspertlər xəbərdarlıq edir: əgər məhdudiyyət uzunmüddətli olarsa, bu, NATO daxilində yeni çatlara səbəb olacaq, qitənin müdafiəsini zəiflədəcək və Vaşinqtonun təsirini azaldacaq. Maraqlısı odur ki, məhdudiyyətlər Ukraynaya birbaşa yardıma aid deyil, amma Avropa ölkələrinin özlərini müdafiə qabiliyyətinə ciddi zərbə vurur.

Rusiya qəsdən NATO-nu sınağa çəkir

Son həftələrdə Rusiya qırıcıları və pilotsuz aparatları Polşa, Estoniya və Rumıniya hava məkanını pozub. Estoniya hadisəsindən sonra rəsmi Tallin NATO müqaviləsinin 4-cü maddəsini işə salaraq təcili məsləhətləşmələr tələb edib.

Çexiya prezidenti Petr Pavel isə açıq mesaj verib: belə hallar "təyyarəni vurmaq üçün əsas"dır. O, NATO-nu sərt reaksiya göstərməyə çağırıb və xatırladıb ki, 2015-ci ildə Türkiyə məhz buna görə Rusiya bombardmançısını vurmuşdu. "Onlar bizim qətiyyətimizi yoxlayır. Əgər sərhəd pozularsa, hərbi cavab verməliyik", - Pavel deyib.

Ukrayna səması bağlanmalıdırmı?

ABŞ-ın keçmiş diplomatı Kurt Volker vurğulayıb ki, Rusiya təxribatları davam edərsə, NATO ölkələri Ukraynanın qərb bölgələri üzərində "genişləndirilmiş hava təhlükəsizliyi zonası" yaratmaq fikrinə daha ciddi yanaşa bilər. Hazırda yalnız Polşa bu təşəbbüsü açıq dəstəkləyir, digər müttəfiqlər Baltik ölkələrinin müdafiəsini prioritet sayır. Lakin Volker hesab edir ki, Moskvanın hər addımı NATO-dakı skeptikləri yumşaltmağa başlayır.

Avropa hava limanlarında kiberhücum xaosu

Gərginliyin yalnız səngərdə və diplomatiyada olmadığını göstərən başqa hadisə Avropa hava limanlarına kütləvi kiberhücum olub. Berlin, Brüssel və Londonun "Hitrou" hava limanlarında kompüter sistemləri sıradan çıxıb, sərnişinlər yalnız əl ilə qeydiyyata alınır, uzun növbələr və uçuş ləğvləri baş verib. "Bild" yazır ki, hücum təkcə bir şəhəri deyil, bütün qitəni əhatə edən provayderi hədəf alıb. Bu, Avropanın kritik infrastrukturunun kiberzəifliyini bir daha göstərib.

Rusiya hava hücumları və təxribatları ilə NATO-nu sınayır, ABŞ isə silah məhdudiyyətləri ilə Avropanı daha çox özünə güvənməyə məcbur edir. Eyni zamanda kiberhücumlar qitənin təhlükəsizliyini başqa cəbhədən hədəfə alır. Gərginlik artdıqca, Avropa ya daha sərt cavab verməli, ya da Moskvanın oyun qaydaları ilə barışmalı olacaq.