"Netanyahunun Qəzzanın işğal planı bölgəni uçuruma aparır" - "Axios"

Bizi sosial şəbəkələrdən izləyin:

"Netanyahu özünün siyasi maraqları naminə övladlarımızı qurban verməyə hazırdır..."

İsrail ordusu sentyabrın 15-dən 16-na keçən gecə Qəzza şəhərinə qarşı genişmiqyaslı quru əməliyyata başlayıb.

Moderator.az xəbər verir ki, bu barədə "axios.com" nəşri yazıb.

Yeni hücum dalğası və Qəzzada böhran

Əvvəlcə İsrail Hərbi Hava Qüvvələri şəhərə güclü aviazərbələr endirib, ardınca tank kolonları Qəzzaya daxil olub. Müdafiə naziri İsrael Kats əməliyyatı "dəmir yumruq" adlandıraraq, məqsədin HƏMAS-ın "terror infrastrukturunu" tamamilə məhv etmək və girovların azad olunması üçün şərait yaratmaq olduğunu bildirib. Kats vurğulayıb ki, hərbçilər cəsarətlə döyüşərək girovların təhlükəsiz çıxarılması və HƏMAS-ın məhv edilməsinə şərait yaradır.

Son günlərdə onlarla çoxmərtəbəli bina bombalanıb, təxminən 300 min nəfər Qəzzanı tərk edərək cənuba, İsrailin "humanitar zona" adlandırdığı ərazilərə sığınmağa məcbur olub. Bununla belə, HƏMAS-ın nəzarətində olan Qəzza Səhiyyə Nazirliyi bildirir ki, ötən ilin oktyabrından bəri İsrailin hücumları nəticəsində 65 minə yaxın fələstinli həlak olub, onların çoxu qadın və uşaqlardır. Yüz minlərlə adam yaralanıb, şəhərdə humanitar böhran daha da dərinləşib.

ABŞ-İsrail danışıqları və Trampın mövqeyi

Əməliyyat Netanyahunun və İsrail hökumətinin yüksək rəsmiləri ilə ABŞ Dövlət katibi Marko Rubionun görüşündən bir neçə saat sonra başlayıb. "Axios"-un məlumatına görə, Rubio Netanyahuya prezident Donald Trampın quru əməliyyatını dəstəklədiyini, lakin onun tez başa çatmasını istədiyini bildirib. ABŞ rəsmilərindən biri isə vurğulayıb:

"Bu, Trampın müharibəsi deyil, Netanyahunun müharibəsidir. O, nəticələrə görə məsuliyyət daşıyacaq". Tramp HƏMAS-ı sərt şəkildə xəbərdar edib. Onun sözlərinə görə, israilli girovlardan "canlı sipər" kimi istifadə olunarsa, bu, "insanlığa qarşı görünməmiş cinayət" olacaq. ABŞ prezidenti terrorçuları girovları dərhal azad etməyə çağırıb və "əks halda hər şey itiriləcək" deyə xəbərdarlıq edib.

İsrail daxilində narahatlıqlar

Əməliyyata dair ən böyük mübahisə isə elə İsrailin özündədir. "Mossad", hərbi kəşfiyyat və təhlükəsizlik xidmətlərinin rəhbərləri Netanyahunu bu addımdan çəkindirməyə çalışıblar. Onların fikrincə, Qəzzanın tam işğalı israilli girovların həyatını təhlükəyə atır, İsrail ordusu üçün böyük itkilərə səbəb ola bilər, HƏMAS-ın tam məhv edilməsini çətinləşdirir, İsraili 2 milyon əhalinin üzərində hərbi idarəçilik tətbiq etməyə məcbur edir.

Hətta girovların ailələrini təmsil edən Forum da bəyanatla çıxış edərək, Netanyahunun siyasi maraqlar naminə onların övladlarını qurban verdiyini bildirib. Forumun sözlərinə görə, əməliyyat nəticəsində girovların həyatı üçün real təhlükə yaranır və son gecə onlar üçün həyati risk daşıyır.

Qarşıda nə gözlənilir?

Netanyahunun "son döyüş" kimi təqdim etdiyi Qəzza əməliyyatı bölgədə humanitar böhranı daha da dərinləşdirib. ABŞ-ın dəstəyinə baxmayaraq, əməliyyatın nəticələri həm İsrail, həm də bütün Yaxın Şərq üçün böyük risklər daşıyır. Hazırkı gedişat göstərir ki, nə HƏMAS, nə də İsrail geri çəkilməyə hazır deyil və Qəzza ətrafında müharibənin ən ağır mərhələsi hələ qarşıdadır.