"Rusiya yenidən Ukraynaya hücum edib: Dağıntılar, qurbanlar və yeni təhlükə" - Ukrayna KİV-ləri

Bizi sosial şəbəkələrdən izləyin:

"150-dən çox "Shahed" buraxılıb, onlarla şəhər zərbə altında qalıb, ölənlər və yaralananlar var..."

2 sentyabr gecəsi Ukrayna şəhərlərinə kütləvi dron zərbələri endirilib. Paytaxt Kiyev, Sumi, Belaya Tserkov və Odessa vilayətinin İzmayıl rayonu əsas hədəflərə çevrilib. Hücum nəticəsində ölənlər və yaralananlar var.

Moderator.az xəbər verir ki, bu barədə "rbc.ua" nəşri məlumat yayıb.

Kiyev və ölkənin mərkəzi bölgələri

Günorta saatlarında "Shahed" tipli dronlar Kiyev üzərində peyda olub. Paytaxtın mərkəzi və sol sahilində hədəflər qeydə alınıb. Məktəblilər ilk dərs günündə dərslərini metroda davam etdirməyə məcbur qalıb. Prezident Ofisinin rəhbəri Andrey Yermak bildirib ki, Rusiya hərbi obyektləri deyil, şəhəri iş vaxtında, küçələrdə çoxlu insan olduğu anlarda vurur. Onun sözlərinə görə, bu, adi terror praktikasına çevrilib.

Hava Hücumundan Müdafiə Qüvvələrinin məlumatına görə, eyni vaxtda Jitomir, Vinnitsa və Çerniqov vilayətlərində də dronlar qeydə alınıb. Ekspertlər ehtimal edir ki, kameralı kəşfiyyat dronları Ukraynanın hava müdafiəsi və kritik infrastruktur obyektlərinin yerini müəyyənləşdirmək üçün istifadə olunur.

Belaya Tserkov: ən ağır zərbə

Kiyev vilayətinin Belaya Tserkov şəhəri hücumların əsas hədəflərindən biri olub. Burada güclü yanğınlar baş verib, çoxmərtəbəli binaların şüşələri sınıb, ticarət və istehsal müəssisələri dağılıb. Dövlət Xilasetmə Xidmətinin məlumatına görə, anqarlarda və üçmərtəbəli sənaye binasında alovlanma olub, sonradan söndürülüb. Təəssüf ki, yanğınların söndürülməsi zamanı bir kişinin meyiti tapılıb. Şəhərdə həmçinin bir neçə insan yaralanıb.

Sumi və Odessa vilayəti

Sumi şəhəri də iki dəfə dron zərbəsinə məruz qalıb. Zərbələrdən biri uşaq bağçasının yaxınlığında qeydə alınıb. Nəticədə yaşayış binaları və təsərrüfat tikililəri dağılıb, xəsarət alanlar arasında bir uşaq da var. Eyni zamanda, Odessa vilayətinin İzmayıl rayonunda liman infrastrukturuna hücum edilib. Yerli hakimiyyətin məlumatına görə, vaxtında görülən tədbirlər nəticəsində daha böyük dağıntıların və çoxsaylı insan tələfatının qarşısı alınıb. Bununla belə, 22 yaşlı bir kişi xəsarət alaraq xəstəxanaya yerləşdirilib.

Rəqəmlər və hava hücumundan müdafiənin fəaliyyəti

Ukrayna Hərbi Hava Qüvvələrinin açıqlamasına əsasən, 2 sentyabr gecəsi Rusiya ümumilikdə 150 "Shahed" və müxtəlif tipli imitasiya dronları buraxıb. Onlar həm Rusiyanın Kursk, Bryansk, Millerovo və Primorsko-Axtarsk bölgələrindən, həm də işğal altındakı Krım ərazisindən havaya qalxıb. Səhərədək hava hücumundan müdafiə qüvvələri 120-dən çox hədəfi məhv edib. Buna baxmayaraq, 30 dron müxtəlif şəhərlərdə hədəfə dəyib, nəticədə yaşayış binaları, müəssisələr və infrastruktur obyektləri dağılıb.

Qışa hazırlıq və yeni risklər

Analitiklər xəbərdarlıq edir ki, yaxın həftələrdə Rusiyanın hava hücumları intensivləşə bilər. Əsas məqsəd isə Ukraynanın enerji infrastrukturunu iflic etməkdir. Hərbi ekspert, UTX-nın sabiq əməkdaşı İvan Stupakın fikrincə, Moskva yenidən Ukraynanı soyuq və qaranlıq qışa sürükləməyə çalışacaq. Prezident Vladimir Zelenski artıq enerji obyektlərinin müdafiəsini gücləndirmək üçün tapşırıq verib. Ukraynalılar isə yeni "enerji terroru" təhlükəsi qarşısında həm müharibənin, həm də gündəlik həyatın ağır sınaqlarına hazırlaşmalı olur.