"Belqradda 100 mindən çox insan ölkə prezidentinin istefası tələbilə etirazlara qoşulub" - "Deutsche Welle"

Bizi sosial şəbəkələrdən izləyin:

Serbiyadakı yeni mitinq noyabrdan bəri davam edən hakimiyyətə və korrupsiyaya qarşı ən kütləvi aksiyalardan biri olub.

Moderator.az xəbər verir ki, bu barədə "dw.com" nəşri məlumat yayıb.

Məlumatda deyilir ki, on minlərlə etirazçı Novi-Saddakı faciənin qurbanlarını anmaq üçün bir dəqiqəlik sükut edib.

Martın 15-də Belqradda keçirilən etiraz nümayişlərində ən azı 107 min insan iştirak edib. Bu, Serbiya Daxili İşlər Nazirliyinin rəsmi qiymətləndirməsidir. Lakin küçə aksiyalarını müşahidə edən yerli "Xalq Məclisləri Arxivi" təşkilatı mitinq iştirakçılarının sayını 275-325 min arasında dəyərləndirib.

Etirazların əsasını tələbələr təşkil etsə də, onlara həkimlər, müəllimlər, motosikletçilər, veteranlar da qoşulub. Hazırkı aksiyanın bir hissəsi isə Belqrada traktorlarla gələn fermerlərin yürüşü olub. Əsas tələb prezident Aleksandar Vuçiçin istefasıdır.

Şəhər hakimiyyəti "ictimai təhlükəsizlik məqsədilə" ictimai nəqliyyatı dayandırıb. Lakin bu, nümayişçiləri dayandırmayıb, bəziləri şəhərə piyada gəlib.

Aksiya zamanı diqqətçəkən hadisələrdən biri avtomobilin etirazçılara çırpılması olub. Sürücü qaçmağa cəhd etsə də, polis onu saxlayıb. Nəticədə üç nəfər yaralanıb.

Bəzi yerlərdə nümayişlər polis qarşıdurmalarına çevrilib. Martın 15-nə keçən gecə polis serb parlamenti binasının qarşısında baryer yaratmaq üçün traktorları istifadə edən Vuçiç tərəfdarlarının texnikasına ziyan vurmağa çalışan fəalları saxlayıb.

Serb polisi etirazçılara qarşı xüsusi vasitələrdən istifadə edib

Bəzi mənbələrə görə, polis nümayişçilərə qarşı LRAD adlı səs silahı tətbiq edib. "N1" və "Visegrad 24" kanalları etirazçılar arasında panika yaradan güclü səs dalğasının məhz bu cihazdan buraxıldığını ehtimal edir. Hadisə Novi-Saddakı dəmiryolu stansiyasında baş verən faciənin qurbanları üçün bir dəqiqəlik sükut anında qeydə alınıb.

LRAD cihazı 160 desibeldən yuxarı səs dalğaları yaya bilər ki, bu da insanın eşitmə qabiliyyəti üçün təhlükəlidir. Uzun müddət təsir etdikdə, o, qulaq pərdəsinin yırtılmasına və geriyədönməz eşitmə problemlərinə səbəb ola bilər.

Serbiya prezidenti Aleksandar Vuçiç etirazlardan öncə və aksiyadan sonra xalqa müraciət edib. O, mitinqi "hakimiyyətə qarşı güclü nifrət və qəzəblə" müşayiət olunan aksiya kimi qiymətləndirib. Bununla belə, o, polisin səs silahından istifadə etdiyini rədd edərək, yayılan səsin sadəcə anti-dron tüfəngindən gəldiyini bildirib.

Etirazların səbəbi və siyasi nəticələr

Serbiyada kütləvi etirazlar noyabrdan bəri davam edir. Onların başlanmasına Novi-Saddakı dəmiryolu stansiyasında baş verən faciə səbəb olub. Noyabrın 1-də təmir olunmuş binanın beton örtüyü çöküb və 6-74 yaş aralığında 15 nəfər həlak olub.

Etirazçılar faciəyə korrupsiya, səhlənkarlıq və hakimiyyətdəki qohumbazlığın səbəb olduğunu bildirir. Dalğanın başlanğıcında tikinti naziri Qoran Vesiç istefa verib. Daha sonra o və digər 12 nəfər saxlanılıb, lakin bu, ictimai narazılığı azaltmayıb.

Yanvarda Serbiya baş naziri və Novi-Sadın keçmiş meri Miloş Vușeviç, eləcə də şəhərin meri istefa verib. Buna baxmayaraq, etirazlar səngiməyib və 15 mart aksiyası ölkədə son onilliklərin ən kütləvi nümayişi hesab olunur. Martın əvvəlində isə parlament iclaslarından biri parlament binasında davaya çevrilib.

Vuçiç etirazların "xaricdən idarə olunduğunu" iddia edib və istefa vermək niyyətində olmadığını vurğulayıb. "Nə qədər sağam, heç bir keçid hökuməti olmayacaq. Küçə qanunları təyin edə bilməz", - deyə o bildirib.