Qəzzada su qıtlığı kritik həddə çatdı: hər 10 nəfərdən yalnız birinin təhlükəsiz içməli suya çıxışı var...

Bizi sosial şəbəkələrdən izləyin:

Qəzzada su qıtlığı kritik həddə çatıb.

Moderator.az xəbər verir ki, bu haqda "Anadolu" agentliyi məlumat yayıb.

İsrailin Qəzzaya humanitar yardım daşıyan blokadası və anklavın Deyr əl-Bələh şəhərində elektrik enerjisinin kəsilməsi mərkəzi duzsuzlaşdırma qurğusunun sıradan çıxmasına səbəb olub və minlərlə fələstinli təmiz sudan məhrum olub. UNICEF-in Qəzzadakı nümayəndəsi Rosaliya Pulenin sözlərinə görə, 2024-cü ilin noyabrında təxminən 600.000 insan içməli suya çıxış əldə edib, lakin su təchizatı tezliklə dayanıb.

Pulen Qəzzada su qıtlığının kritik həddə çatdığını vurğulayıb. Hazırda hər on nəfərdən yalnız birinin təhlükəsiz içməli suya çıxışı var, əhalinin 90 faizi isə əsas ehtiyaclarını ödəmək üçün təmiz su əldə etmək üçün mübarizə aparır.

“Su bizim həyatımızdır. Su ilə yemək bişiririk, su içirik, paltar yuyuruq, namaz üçün dəstəmaz alırıq. Amma sərhəd qapıları bağlıdır və şirin su yoxdur. Biz oruc tuturuq və yaşamaq üçün təmiz suya ehtiyacımız var.

İftarımız var, sahurumuz var, qab-qacaq qalaq-qalaq yığılır, sadəcə olaraq su yoxdur"Ş- beş uşaq anası Hitam Əbu Aye belə deyib.

Xərçəng xəstəsi Semer Zareb hər üç-dörd gündə bir kanistr su alır.

“Paltar yumaq, qab yumaq, çimmək üçün bir neçə gün su gözləməliyik. Biz içməli su almağa çalışsaq da, o, sadəcə olaraq satışda olmur. Suyumuz üçün istifadə etdiyimiz bidonlar o qədər çirkli və köhnədir ki, sağlamlıq üçün təhlükə yaradır. Su həyatdır, amma Qəzzada yoxdur", - deyə qadın şikayətlənir.

Deyr əl-Bələh administrasiyasının rəhbəri Nizar Ayyaşın sözlərinə görə, sutəmizləyici qurğuda elektrik enerjisinin kəsilməsi Qəzza zolağının mərkəzi və cənubunda şirin su təchizatının 70 faiz azalmasına səbəb olub. Ayyaş bildirib ki, 100 min insanı içməli su ilə təmin edən bələdiyyə vətəndaşların suya çıxışını təmin etmək üçün generatorlardan istifadə etməyə başlayacaq.

İsrailin zərbələri su çatışmazlığından əlavə, su və kanalizasiya sistemlərini də zədələyib. Qəzzada hazırda 330 min metr su təchizatı şəbəkəsi və 655 min metr kanalizasiya xətti istismardan çıxıb. Qəzzanın su ehtiyatlarının 35 faizi sıradan çıxıb, 717 quyu isə işləmir...

S.Laçın