Qadın cazibədarlığının 8 əsas amili

Bizi sosial şəbəkələrdən izləyin:

"Həqiqi cazibədarlıq zahirdən deyil, daxildən - özünəinam, pozitiv düşüncə və insanlara qarşı səmimi maraqdan qaynaqlanır..."

Kişiləri qadınlarda təkcə zahiri görünüş deyil, jestlər, vərdişlər və hətta qoxu da cəlb edir. Üstəlik, bəzi amillər xarici gözəllikdən daha vacibdir, bunu araşdırmalar sübut edib.

Moderator.az xəbər verir ki, bu barədə "Styler" nəşri yazıb.

Bəs kişilər qadınlarda daha çox nəyə diqqət yetirir? Bu, zahiri görünüş, xarakter, yoxsa xüsusi bir cazibədarlıqdır? Alimlər bir sıra araşdırmalar apararaq, qadınların cazibədarlığını formalaşdıran əsas amilləri müəyyən edib.

1. Zahiri görünüş: təbii gözəllik və harmoniya

Qadın cazibədarlığının əsas amillərindən biri üz cizgilərinin simmetrik olmasıdır. Alimlərin fikrincə, simmetrik üz quruluşu sağlamlıq və güclü genetika ilə əlaqələndirilir və bu, insan şüuraltısında xüsusilə cəlbedici qəbul edilir.

Bundan əlavə, təbii gözəllik də önəmlidir. Kopenhagen Universitetinin araşdırmasına görə, kişilərin əksəriyyəti qadınların minimal makiyajdan istifadə etməsinə üstünlük verir. Kosmetika təbii gözəlliyi vurğulamalı, onu tamamilə gizlətməməlidir.

2. Bədən dili: jestlər, duruş və plastiklik

Yalnız üz cizgiləri deyil, qadının hərəkət tərzi də onun necə qavrandığını ciddi şəkildə dəyişir. "Psychological Science" jurnalında dərc olunan tədqiqatlar göstərib ki, zərif hərəkətlər, inamlı duruş və açıq bədən dili qadını daha cəlbedici edir. Bu tip qeyri-verbal siqnallar özünəinam və qadınlıq hissini artırır.

3. Səs: intonasiya və tembr

Səsin tonu da kişilər üçün mühüm cəlbedicilik amilidir. Makmaster Universitetinin alimləri müəyyən edib ki, daha yüksək və melodik səs tonu gənclik və enerji ilə əlaqələndirilir və bu, qadını daha cazibədar edir.

4. Qoxu: fərdi rahiyə (ətir)

Qoxu cazibədarlığın formalaşmasında mühüm rol oynayır. Araşdırmalar göstərib ki, kişilər qadının təbii qoxusuna instinktiv olaraq reaksiya verir. Bundan əlavə, yüngül və həddindən artıq nəzərə çarpmayan ətirlər qadının fərdi qoxusunu vurğulayaraq onun cazibədarlığını artırır.

5. Zəka və yumor hissi

Cəlbedicilik yalnız fiziki xüsusiyyətlərlə məhdudlaşmır. Kişilər maraqlı söhbət apara bilən və yaxşı yumor hissinə malik olan qadınları yüksək qiymətləndirir. Kanzas Universitetinin araşdırmasına görə, yumor insanlar arasında emosional bağ yaratmağa və inam mühiti formalaşdırmağa kömək edir.

6. Emosional açıqlıq və mehribanlıq

Səmimi şəkildə emosiyalarını ifadə edən və açıqlıq göstərən qadınlar daha cazibədar görünür. Harvard Universitetinin araşdırmasına görə, bu xüsusiyyətlər dərin və etibarlı münasibətlərin formalaşmasına töhfə verir.

7. Baxımlılıq və detallara diqqət

Təmiz və səliqəli görünüş, sağlam dəri, gözəl saçlar və zövqlü geyim qadının özünə hörmət etdiyini və inamlı olduğunu göstərir. "Journal of Social Psychology" jurnalında yayımlanan araşdırmaya görə, baxımlılıq sadəcə estetik deyil, eyni zamanda özünəqayğı və yüksək özünəinamın göstəricisidir.

8. Ən önəmli amil- səmimiyyət və özünəinamdır

Ən cazibədar qadınlar özlərini rahat hiss edənlərdir. Özünəinam, səmimiyyət, qayğıkeşlik və mehribanlıq qadını həqiqətən cəlbedici edən xüsusiyyətlərdir.

Beləliklə, qadın cazibədarlığı bir çox amillərin birləşməsindən asılıdır. Kişilərin fərdi üstünlükləri olsa da, onların əksəriyyəti təbii gözəllik, özünəinam, zəka və emosional açıqlığın harmoniyasını daha cəlbedici hesab edir.

Həqiqi cazibədarlıq zahirdən deyil, daxildən- özünəinam, pozitiv düşüncə və insanlara qarşı səmimi maraqdan qaynaqlanır.