Zelenski London sammitindən sonra Ukrayna xalqına müraciətdə nələr dedi?..

Bizi sosial şəbəkələrdən izləyin:

O, birliyin nə qədər çox vacib olduğunu hiss edən hər kəsə təşəkkür edib...

Yaxın gələcəkdə Avropa ölkələri Ukrayna müharibəsi və öz təhlükəsizlikləri ilə bağlı ortaq mövqelər formalaşdıracaq ki, onları Amerika Birləşmiş Ştatlarına təqdim etsinlər.

Moderator.az "UNİAN"-a və "TSN"-ə istinadla xəbər verir ki, bu barədə Ukrayna prezidenti Vladimir Zelenski ukraynalılara video-müraciətində bildirib. Onun sözlərinə görə, "Securing Our Future"(“Gələcəyimizə Təminat”) sammitində hər kəs real dünyanın real təhlükəsizlik təminatlarını tələb etməsi fikrini dəstəkləyib.

Qarşıdakı həftələrdə çoxlu sülh diplomatiyası görüşləri gözlənilir.

"Əlbəttə, biz Amerikanın əhəmiyyətini başa düşürük. Və biz Amerika Birləşmiş Ştatlarından aldığımız bütün dəstəyə görə minnətdarıq. Elə bir gün olmayıb ki, bu minnətdarlığı hiss etməyək", - prezident əlavə edib.

Zelenski qeyd edib ki, Ukraynaya əbədi müharibə yox, sülh lazımdır və müharibəni bitirmək üçün açar məhz təhlükəsizlik zəmanətləridir:

"Yaxın gələcəkdə biz hamımız Avropada öz mövqelərimizi, ümumi mövqelərimizi formalaşdıracağıq. Bizim çatmalı olduğumuz və geri çəkilə bilməyəcəyimiz xətlər. Bu cür mövqelər Amerika Birləşmiş Ştatlarındakı tərəfdaşlarımıza təqdim olunacaq.Təhlükəsizlik, sülhün müddəti, müharibəni bitirmək üçün düzgün razılaşma - bu bizim ümumi prioritetimizdir."

"Bu günlərin nəticəsidir ki, Avropadan qəti dəstək var. Daha çox birlik, daha çox əməkdaşlığa hazır olmaq əzmi mövcuddur. Əsas odur ki, hamı bir şeydə həmrəydir: gerçəkdən sülhün olması üçün gerçək təhlükəsizlik təminatları lazımdır. Bu, bizim bütün Avropanın - bütün qitənin mövqeyidir. Böyük Britaniya, Avropa İttifaqı, Norveç və Türkiyənin...", - deyə dövlət başçısı vurğulayıb.

Zəruri xatırlatma:

Martın 2-də Böyük Britaniyada Avropanın müdafiə qabiliyyətinin gücləndirilməsinə və Rusiyanın davam edən təcavüzü qarşısında Ukraynaya dəstək verməyə həsr olunmuş “Gələcəyimizə Təminat” sammiti keçirilib. Tədbirdə Avropa liderləri, NATO-nun baş katibi Mark Rutte və digər yüksək səviyyəli rəsmilər iştirak ediblər.

Böyük Britaniya Ukraynaya 5000-dən çox hava hücumundan müdafiə raketi almaq üçün 1,5 milyard funt sterlinqdən çox ixrac maliyyəsinə çıxış təmin edəcəyini açıqlayıb.

Aİ liderləri həmçinin müdafiə qabiliyyətinin təcili gücləndirilməsi və hərbi xərclərin artırılmasının zəruriliyi ilə bağlı razılığa gəliblər.

Sammitdən sonra Ukrayna prezidenti Vladimir Zelenski Sandrinqem sarayında Böyük Britaniya kralı III Çarlz ilə görüşüb...