"Öcalanın silahı yerə qoyma çağırışının birbaşa Ermənistanla əlaqəsi var...”- İddia

Bizi sosial şəbəkələrdən izləyin:

Abdulla Öcalanın Kürdüstan Fəhlə Partiyasını-“PKK”-nı buraxıb silahlarını yerə qoymağa çağırışının da Ermənistan və onun təhlükəsizlik məsələləri ilə birbaşa əlaqəsi var.

Moderator.az xəbər verir ki, türkoloq Andranik İspiryan News.am- a müsahibəsində bunu qeyd edib.

"Türkiyə Kürdüstan Fəhlə Partiyasının bütün məsələlərini həll etməklə, böyük hərbi potensialı digər bölgələrə, yəni Ermənistana, digər tərəflərə yönəldəcək. Bu, Ermənistanın milli təhlükəsizliyi baxımından bizim üçün ciddi təhlükələri artırır".

Bunun niyə indi baş verdiyini soruşduqda İspiryan belə cavab verib:

“Türkiyə 40 ilə yaxındır ki, hərbiləşdirilmiş hərəkat olan “PKK” ilə mübarizə aparır. Bu illər ərzində həm mülki vətəndaşlar, həm də türk əsgərləri olmaqla, bir neçə dəfə Abdulla Öcalan vasitəsilə o hərbi mübarizədən geri çəkilmək və siyasi mübarizəni davam etdirmək cəhdləri olub, amma indi bir an gəlib, Yaxın Şərqdə gedən proseslər Türkiyəni bu bəyanatı verməyə məcbur edib...

Hakimiyyətin fəal iştirakı və vasitəçiliyi ilə Türkiyə parlamentindəki Kürd Xalqların Bərabərlik və Demokratiya Partiyasından olan nümayəndələr ömürlük həbs cəzası alan Öcalanın saxlandığı İmralı adasına gedərək, dərc olunan mətnlə bağlı razılığa gəliblər.

Türkiyə də yaxşı başa düşür ki, “PKK” təkbaşına Türkiyəyə qarşı fəaliyyət göstərmir, həm də müxtəlif supergüclər tərəfindən idarə olunur. “Bu hərəkatın Qərbdən, Şərqdən və ya bizim Şərqdən yönəlməsi hələ də davam edən əsas problemdir”.

“PKK” silahlılarının Öcalanı dinləyib silahlarını yerə qoyacağına gəlincə, İspiryan deyib ki, bu barədə danışmaq hələ tezdir, çünki “PKK”-lılar bundan sonra amnistiyaların olacağına, fəalların azadlığa buraxılacağına, ölkənin siyasi həyatına inteqrasiya olunacağına əmin olmalıdırlar ki, “Bütün bunlar hər an hansısa vasitəsilə, hətta birbaşa xaricdən güclə də dayandırıla bilər”.

S.Laçın