Almaniyada Bundestaqa növbədənkənar seçkilər keçirilir

Bizi sosial şəbəkələrdən izləyin:

"Seçkilərin favoriti xristian demokratlar və xristian sosialistlərdir, hazırkı kanslerin partiyası üçüncü yerdə qərarlaşıb..."

Bu bazar günü Almaniyada növbədənkənar parlament seçkiləri keçirilir. Onlar ötən ilin sonunda Bundestaq tərəfindən kansler Olaf Şoltsa etimadsızlıq göstərdikdən sonra fevralın 23-nə təyin edilib. Buna səbəb hökumət koalisiyasının büdcə maliyyələşdirilməsi məsələlərində fikir ayrılığına görə dağılması olub.

Moderator.az xəbər verir ki, bu barədə "svoboda.org" nəşri məlumat yayıb.

Məlumatda deyilir ki, hazırkı Almaniya hökuməti planlaşdırıldığından altı ay əvvəl istefaya gedir. Hökumət böhranı olmasaydı, növbəti seçkilər 2025-ci ilin sentyabrında baş tutacaqdı.

Parlamentdə təmsil olunmaq uğrunda Almaniyanın yeddi aparıcı partiyası və 22 kiçik partiya mübarizə aparır. Ən çox seçici səsi qazanan partiya federal kansler vəzifəsinə namizəd irəli sürə biləcək (adətən bu namizəd partiyanın sədri olur). Onun namizədliyini Almaniya prezidenti Frank-Valter Ştaynmayer təsdiqləməlidir. Daha sonra Bundestaqa daxil olan partiyalar hakim koalisiya formalaşdırmalıdır. Adətən koalisiya iki və ya üç partiyadan ibarət olur. Koalisiyaya daxil olmayan partiyalar parlament müxalifətini təşkil edəcək.

ZDF İctimai televiziya kanalının sifarişi ilə seçkilərdən bir neçə gün öncə aparılan sorğuya görə, seçkilərin favoriti Xristian Demokratlar və Xristian Sosialistlər blokudur (XDİ/XSİ). Onu Almaniya vətəndaşlarının 28 faizi dəstəkləməyə hazırdır. Bu halda kanslerliyə namizəd XDİ-in rəhbəri, 69 yaşlı Fridrix Mers olacaq. XDİ/XSİ proqramında Almaniya iqtisadiyyatının artımının gücləndirilməsi və vergi güzəştləri nəzərdə tutulur.

Sorğulara əsasən, ikinci yerdə "Almaniya üçün Alternativ" (AfD) sağ populist partiyası qərarlaşıb. Onun lehinə 21 faiz seçici səs verməyə hazırdır. AfD proqramında miqrasiya qanunlarının sərtləşdirilməsinə və təhlükəsizlik məsələlərinə xüsusi diqqət yetirir, bu da seçicilərin bir hissəsinin narahatlığını əks etdirir.

Partiya həmçinin Rusiya ilə tərəfdaşlıq münasibətlərinin qurulmasını tələb edir. Almaniya xüsusi xidmət orqanları dəfələrlə AfD deputatlarını Kreml tərəfindən maliyyələşdirmədə şübhəli bilib və araşdırmalar aparıb.

Üçüncü yerdə 16 faiz seçici dəstəyi ilə Almaniya Sosial Demokrat Partiyası (ASDP) gəlir. Hazırkı kansler Olaf Şolts bu partiyanın üzvüdür. ASDP infrastruktur layihələrinin və sosial proqramların dövlət tərəfindən maliyyələşdirilməsinin artırılmasını müdafiə edir.

Seçicilərin 14 faizi "Yaşıllar" partiyasına səs verməyə hazırdır. Bu sol partiya ekoloji məsələləri və sosial dəstəyin artırılmasını təşviq edir. 8 faiz seçici "Solçular" partiyasına dəstək vermək niyyətindədir. Onlar müdafiə xərclərinin artırılmasına qarşı çıxır və vergi ödəyicilərinin vəsaitlərinin əsasən sosial proqramlara və infrastruktur layihələrinə yönəldilməli olduğunu bildirir.

Azad Demokrat Partiyası, proqramında sərt maliyyə və dövlət borcu nəzarətini prioritet kimi göstərir və təxminən 4,5 faiz səs qazana bilər. Eyni dəstək faizi yeni solçu "Sara Vaqenknext İttifaqı"na aiddir. Bu partiya müdafiə xərclərinin artırılmasına qarşı çıxır, Ukraynaya hərbi yardımın dayandırılmasını və Rusiya ilə yaxınlaşmanı müdafiə edir. Hər iki partiyanın parlamentə daxil olmaq üçün lazım olan beş faizlik baryeri aşa bilməyəcəyi ehtimalı böyükdür.

Bundan başqa, sorğuda iştirak edənlərin 4 faizi kiçik partiyalara səs verəcəyini bildirib. Almaniya üzrə seçki məntəqələri səhər saat 8-dən axşam saat 6-ya qədər açıq olacaq. Bundan əlavə, Almaniya vətəndaşları seçki bülletenini seçki günü və ya öncədən poçt vasitəsilə göndərə bilər.