"Kelloq Trampa Ukraynadakı müharibənin başa çatdırılması üçün variantlar təqdim edəcək" - "Bloomberg"

Bizi sosial şəbəkələrdən izləyin:

"Tramp və komandası Avropanı Ukraynaya dəstəkdə daha fəal rol oynamağa çağırır..."

Donald Trampın Ukrayna və Rusiya məsələləri üzrə xüsusi nümayəndəsi, istefada olan general Kit Kelloq qarşıdakı həftələrdə ABŞ prezidentinə müharibənin dayandırılması üçün mümkün sülh planlarını təqdim etməyi planlaşdırır.

Moderator.az xəbər verir ki, bu barədə "Bloomberg" nəşri yazıb.

Qeyd edilir ki, Kelloq fevralın 14-də başlayacaq Münhen Təhlükəsizlik Konfransı çərçivəsində bir sıra rəsmi şəxslərlə görüşməlidir. O, həmçinin Kiyevə və digər Avropa paytaxtlarına səfər edəcək. Lakin Moskvanı ziyarət etməyi planlaşdırmır.

Kelloqun Avropa rəsmiləri ilə Ukraynadakı hər hansı bir sülh razılaşmasının təmin edilməsi üçün çəkindirici qüvvələr yaratmaq təşəbbüsünü müzakirə edəcəyi gözlənilir. Mənbələrin sözlərinə görə, ABŞ bu prosesə öz qoşunlarını göndərməyə ehtimal ki, razı olmayacaq, lakin digər dəstək formalarını təmin edə bilər.

Bundan əlavə, xüsusi nümayəndənin Avropanı müdafiə xərclərini artırmağa çağıracağı bildirilir, bu, Trampın əvvəllər dəfələrlə tələb etdiyi bir məsələdir. "Semafor" nəşri yazır ki, Kelloq Tramp üçün müxtəlif ssenarilər hazırlayır. Mənbələrin fikrincə, bu, ABŞ liderinin Ukrayna prezidenti Vladimir Zelenski və Rusiya prezidenti Vladimir Putinlə birbaşa danışıqlar aparması üçün zəmin yarada bilər.

Bundan öncə Ağ Ev rəhbəri müharibəni dayandırmaq üçün Putinlə birbaşa danışmağa hazır olduğunu bildirib. O, həmçinin Rusiya lideri danışıqlara razı olmazsa, yeni sanksiyalar tətbiq edəcəyi ilə hədələyib.

Moskvaya təzyiq məsələsinə gəldikdə, bəzi Avropa rəsmiləri ABŞ-a Rusiyanın enerji sektoruna qarşı daha sərt tədbirlər görməyi tövsiyə edir. Bunların arasında neft üçün tətbiq olunan qiymət həddinin aşağı salınması və dondurulmuş Rusiya aktivlərindən istifadə edilməsi də var.

Digər tərəfdən, Tramp və komandası Avropanı Ukraynanın dəstəyində daha fəal rol oynamağa çağırır. Vaşinqton eyni zamanda Kiyevdən yardım qarşılığında təbii resurslarına, xüsusən də strateji əhəmiyyətli faydalı qazıntılara çıxış imkanı verməsini və daha çox Amerika enerji resursları almasını gözləyir.

Rusiya-Ukrayna müharibəsinin başa çatdırılması

"The Telegraph" nəşri xəbər verir ki, ABŞ prezidenti Donald Tramp administrasiyası Rusiya-Ukrayna müharibəsini dayandırmaq üçün hazırlanan sülh planı üzərində işi müvəqqəti dayandırıb. Bu addım NATO müttəfiqlərinə danışıqlar prosesində iştirak üçün daha çox imkan yaratmaq məqsədilə atılıb.

Qeyd edilir ki, Trampın Ukrayna və Rusiya üzrə xüsusi nümayəndəsi Kit Kelloq əvvəlcə NATO-nun 31 üzv dövlətinin liderləri ilə məsləhətləşmələr aparmaq istəyir. O, bu danışıqlarda hər hansı mümkün sülh sazişinin formasını və hökumətlərin bu prosesə nə dərəcədə töhfə verəcəyini müəyyənləşdirməyə çalışacaq.