"Biz Qəzzada istənilən varianta hazırıq" - Pentaqon rəhbəri

Bizi sosial şəbəkələrdən izləyin:

"Tramp standart düşüncə çərçivəsinə sığmayan, hər şeyi alt-üst etməyə hazır olan insandır..."

ABŞ hərbçiləri Qəzza bölgəsinə dair bütün mümkün addımları nəzərdən keçirir.

Moderator.az xəbər verir ki, bu barədə ABŞ müdafiə naziri Pit Hegset "Fox News" telekanalına müsahibəsində bəyan edib.

"Biz bütün variantları nəzərdən keçiririk", - o, açıq şəkildə vurğulayıb. - "Biz konkret olaraq nə edəcəyimizi və ya etməyəcəyimizi açıqlamayacağıq". Bununla yanaşı, Hegset qeyd edib ki, Tramp "standart düşüncə çərçivəsinə sığmayan", "hər şeyi alt-üst etməyə hazır" bir insandır.

Beləliklə, Pentaqon rəhbəri ABŞ-ın mövqeyini gücləndirərək, Trampın ABŞ-ın Qəzza bölgəsinə nəzarəti ələ alması təklifinə dəstək nümayiş etdirib.

"İsrail HƏMAS-ı məhv etmək istəyir və buna qadirdir", - Hegset əlavə edib. - "Prezident Tramp isə HƏMAS-ın məhv edilməsindən sonra Qəzzanın statusunun necə olacağı, hansı təminatlar veriləcəyi ilə bağlı danışıqlar aparmaq istəyir".

"Siz sülhü, İsraili məhv etməyə çalışan terrorçuları aradan qaldıraraq təmin edirsiniz", - nazir əlavə edib. - "Sülh belə təmin edilir və buna görə də mən bunu dəstəkləyirəm. Bundan sonra nə baş verəcəyi isə daha uzun müzakirə mövzusudur".

Bununla yanaşı, o, ABŞ qoşunlarının Qəzza bölgəsinə göndərilməsi ehtimalını "çox uzaq" bir perspektiv kimi qiymətləndirib. "Düşünürəm ki, biz bu məsələdən çox uzağıq", - o, deyib.

Nazirin fikrincə, belə bir qərarın qəbulundan öncə "ABŞ prezidenti, onun milli təhlükəsizlik üzrə müşaviri, müttəfiqlər və tərəfdaşlarla uzunmüddətli danışıqlar" aparılmalıdır. Pentaqon rəhbəri "ABŞ hərbçilərinin Fələstin anklavına ehtiyac olmadığı halda göndərilməsini arzulamadığını" etiraf edib.

"İsraillilər HƏMAS-a qarşı kampaniyanı başa çatdırmaq istəyir", - Hegset deyib. - "Onlar 7 oktyabr hadisələrinə görə məsuliyyət daşıyanları aradan qaldırmaq, girovları qaytarmaq istəyir. Biz isə onların müttəfiqi olaraq bu məsələdə onlara kömək etmək niyyətindəyik".

Bundan öncə xəbər verildiyi kimi, ABŞ Dövlət katibi Marko Rubio və prezidentin Yaxın Şərq üzrə xüsusi nümayəndəsi Stiv Uitkoff isə əksinə, milli təhlükəsizlik müşaviri Mayk Uolts və Ağ Evin mətbuat katibi Karolin Livittin mövqeyini dəstəkləyərək, Trampın Qəzza üzərində nəzarət planının bəzi elementlərinə yenidən baxmağa və ya ən azından onun ən kəskin məqamlarını yumşaltmağa tələsib.

Ağ Ev bundan öncə bəyan edib ki, Tramp hələlik ABŞ qoşunlarının Qəzzaya göndərilməsi ilə bağlı yekun qərar qəbul etməyib və bu, onun Fələstin anklavı üzərində nəzarət planının mümkün həyata keçirilməsi çərçivəsində nəzərdən keçirilir.

Trampın ideyası bir çox ölkələr tərəfindən pislənilib, həmçinin Konqresdə respublikaçılar arasında fikir ayrılığına səbəb olub. Respublikaçılar ümumilikdə prezidentin xarici yardımları dayandırmaq və federal idarələrdə kütləvi ixtisarlar aparmaq kimi təşəbbüslərini dəstəkləsələr də, bu məsələdə yekdil deyil.

Hegset bəyan edib ki, Pentaqon İsrailə daha öncə ABŞ-ın müttəfiqinə təqdim etmədiyi silahları tədarük edəcək. Müdafiə nazirinin sözlərinə görə, bu silahlar İsrailin radikal düşmənlərinin zərərsizləşdirilməsində faydalı ola bilər.

Tramp artıq əvvəlki demokrat prezident Co Baydenin İsrailə 2 min funtluq aviasiya bombalarının tədarükünə qoyduğu qadağanın aradan qaldırılması barədə göstəriş verib. Bu bombaların hər biri güclü beton və metal konstruksiyaları deşməyə, eləcə də güclü zərbə dalğası yaratmağa qadirdir.