“44 günlük müharibədə məğlub olaraq suveren dövlətə sahib olmaq imkanı qazandıq...”- Paşinyan

“Ermənistanda ideoloji dəyişiklik baş verir”.

 

Moderator.az xəbər verir ki, News.am-ın yaydığı məlumata görə, bunu Ermənistan baş naziri Nikol Paşinyan Vaşinqtonda erməni icması ilə görüşündə deyib. O bu dəyişikliyin ilk növbədə hakimiyyətdə baş verdiyini qeyd edib.

 

"Məsələ onda deyil ki, bizdən əvvəl iqtidarda başqa ideologiya var idi və biz gəldik, onların ideologiyasını rədd etdik, məsələ ondadır ki, biz yeni ideologiyanı təqdim edirik və indi ideoloji transformasiya gedir. Məncə, belə bir fikir var idi ki, Ermənistan Respublikası ali məqsədlər üçün dayaq nöqtəsi olmalıdır. Bu məqsədlər, məncə, tarixi keçmişlə bağlıdır. İdeologiya aşağıdakılara doğru dəyişir: Ermənistan Respublikasının özü ali milli məqsəddir və bundan daha yüksək milli məqsəd ola bilməz. Ona görə də Ermənistan Respublikasının funksional əhəmiyyətinə diqqət yetirmək çox vacibdir ki, bu da onun təhlükəsizliyini, vətəndaşların rifahını və xoşbəxt gələcəyini təmin etməkdir”, -deyə erməni hökumət başçısı bildirib.

 

Paşinyan qeyd edib ki, bu ideoloji transformasiya erməni xalqının keçdiyi yola görə baş verir.

 

"Ermənistana mövcud olmaq şansı verən yeganə şey bu ideologiyadır. Biz bütün bu nəticələrə ona görə gəlmişik... 44 günlük müharibənin məğlubiyyəti və bu məğlubiyyətin dərin və o qədər də dərin olmayan səbəbləri sayəsində məncə, bu gün o məğlubiyyətdən keçərək müstəqil, suveren dövlətə sahib olmaq imkanı əldə etdik. Mən çox düşündüm və belə qənaətə gəldim ki, qurbanlar heç nəyə görə deyil, Ermənistanın suverenliyi naminə verilib və indi biz sadəcə olaraq bu qurbanın imkanlarından istifadə etməyə diqqət yetirməliyik”, -deyə Paşinyan çoxları üçün gözlənilməz fikrini diqqətə çatdırıb.

 

S.Laçın