"Avropa İttifaqı Rusiyanın maye qazının idxalına son qoymağın yollarını axtarır" - "Bloomberg"

Bizi sosial şəbəkələrdən izləyin:

"Ötən il Avropa İttifaqı Rusiyadan rekord həcmdə mayeləşdirilmiş təbii qaz idxal edib, əsas idxalçılar Fransa, İspaniya və Belçika olub..."

Avropa İttifaqının Rusiyanın Ukraynaya müdaxiləsinə görə hazırladığı yeni sanksiyalar paketində Rusiya maye təbii qazının idxalının tədricən dayandırılmasını təklif edəcəyi ehtimal edilmir.

Moderator.az xəbər verir ki, bu barədə "Bloomberg" nəşri yazıb.

Nəşr yazır ki, bunun əvəzində blok gələn ay təqdim ediləcək yol xəritəsinə güvənəcək və bunun vasitəsilə Rusiya yanacağının idxalına son qoymaq üçün yollar axtaracaq. Danışıqların məxfiliyi səbəbindən bu şəxslərin adları açıqlanmayıb.

Avropa İttifaqının 10 ölkədən ibarət bir qrupu Rusiyaya qarşı tədbirləri sərtləşdirmək və təbii qazla mayeləşdirilmiş təbii qaza məhdudiyyətlər tətbiq etməkdə israr edir. Lakin Avropa İttifaqının sanksiyalarının qəbul edilməsi üçün yekdillik tələb olunur ki, bu da Macarıstanın sərt müqaviməti və bəzi ölkələrin hələ də Rusiya qazından asılılığı səbəbindən çətin olacaq.

Rusiyanın maye qazı Moskvanın boru kəməri vasitəsilə qaz tədarükünü dayandırmasından sonra, Avropanın bu ölkədən asılı qaldığı son əsas enerji resurslarından biri olaraq qalır. Ötən il Avropa İttifaqı Rusiyadan rekord həcmdə maye təbii qaz idxal edib, əsas idxalçılar isə Fransa, İspaniya və Belçika olub.

Avropa siyasətçiləri regionun son illərdə üzləşdiyi iqtisadi çətinliklər fonunda qiymət şoklarından qaçmaq üçün yanacaqla bağlı məhdudiyyətləri sərtləşdirməkdən çəkinib. Lakin 2026-2027-ci illərdə ABŞ və Qətərdə tikilən zavodlardan yeni tədarüklərin qiymətlərini aşağı salacağı gözlənilir.

ABŞ və Avropa İttifaqı Rusiyanın bəzi maye təbii qaz layihələrinə sanksiyalar tətbiq edərək Moskvanın ixrac genişlənməsi planlarını məhdudlaşdırmağa çalışsa da, bu səylər regionda Rusiya təchizatına olan tələbi azalda bilməyib.

27 üzv ölkədən ibarət Avropa İttifaqı fevralı 24-də Rusiyaya qarşı 16-cı sanksiya paketini qəbul etməyi və fevralın 26-da Rusiya yanacağından tədricən imtinaya dair yol xəritəsini təqdim etməyi planlaşdırır. Bu planda idxalın dayandırılması üçün görüləcək tədbirlər göstərilsə də, ətraflı qanunvericilik, çox güman ki, daha sonra təqdim ediləcək.

Avropa İttufaqı qanunlarının qəbul edilməsi üçün adətən üzv dövlətlərin çoxluğu və Avropa Parlamentinin əksəriyyətinin dəstəyi tələb olunur.

Avropa Komissiyasının sədri Ursula fon der Lyayen Moskvanın Ukraynaya hücumunun yaratdığı enerji böhranından sonra Avropanın 2027-ci ilə qədər Rusiyadan enerji resurslarının idxalını dayandırmalı olduğunu vurğulayıb.