“Bölgələrdə tamaşaçıların rus dilini bilməsi bizi sevindirir, çünki...”

Bizi sosial şəbəkələrdən izləyin:

“Teatra mütləq oranı sevən adamlar gəlməlidir. Bu müsbət haldır ki, Akademik Rus Dram Teatrının hər zaman tamaşaçısı var. Onu da qeyd etmək istəyirəm ki, bizim teatra son zamanlar turistlər axın edib. Bu turistlərin içərisində də rusdilli adamlar çoxluq təşkil edir. Onlar gəlib Bakı şəhərini gəzəndə afişanı görürlər, internetdən izləyib, daha sonra teatrımızla əlaqə saxlayırlar. Bizə gələn telefon nömrələrindən də görürük ki, bu Bakı nömrəsi deyil, xarici nömrədir. Biz özümüz üçün də statistika aparırıq ki, teatrımıza nə qədər tamaşaçı gəlir. Bunları bilmək bizim üçün də vacibdir. Analiz edəndə görürük ki, turistlərin bizə axını, tetarımıza böyük xeyri var. Tamaşaçılar teatrı seçirlər. Sonra bir-birlərinə danışırlar”

Bunu Moderator.az-a özəl açıqlamasında Azərbaycan Dövlət Akademik Rus Dram Teatrının direktoru, Əməkdar Mədəniyyət İşçisi Ədalət Hacıyev deyib.

O daha sonra bildirib ki, sənət ocağı artıq illərdir ki, bölgələrdə qastrol səfərlərinə gedir.

“2023-cü ildən başlayaraq Mədəniyyət Nazirliyinin dəstəyi ilə bölgələrdəki teatrlara qastrol səfərləri təşkil edirik. Demək olar ki, teatr olan bütün bölgələrdə səfərlərdə olmuşuq. Teatrımız regionda olan sənət ocaqları ilə daim əlaqədə olur. Bu yaradıcı mübadilə bizim üçün də, bölgə teatrları üçün də çox yaxşı bir göstəricidir. Tamaşaçıların bölgələrdə rus dilini bilməsi əlbəttə ki, bizi sevindirir. Bütün tamaşalar anşlaqla keçirdi. Elə gün olurdu ki, biz gedib tamaşanı nümayiş etdirəndən sonra qalırdıq. Bir gün uşaqlar üçün, bir gün də böyüklər üçün tamaşa oynayırdıq. Bu layihədə bizi dəstəklədiyinə görə Mədəniyyət Nazirliyinə xüsusi təşəkkür edirik. Əlbəttə ki, istərdik və çalışacağıq ki, 2025-ci ildə də bu layihəni davam etdirək. Çünki bu layihə regionlarda mədəniyyətin inkişafına böyük təkan verir” deyə teatrın direktoru Ədalət Hacıyev deyib.